नवनिर्वाचित राष्ट्रपति रामचन्द्र पौडेलयात निर्वाचन आयोगं निर्वाचित जूगु दसिपौ लःल्हाःगु दु। न्हुगु बानेश्वरया सङ्घीय संसद् भवनय् पौडेलयात थौं बिहीवाः निर्वाचन आयोगया प्रमुख आयुक्त दिनेशकुमार थपलियां निर्वाचित जूगु दसिपौ लःल्हाःगु खः।

ज्याझ्वलय् निर्वाचन अधिकृत महेश शर्मा पौडेलं चुनावया लिच्वः घोषणायासे नेता रामचन्द्र पौडेल निर्वाचित जूगु जानकारी बिःगु खः। उगु ज्याझ्वलय् प्रधानमन्त्री पुष्पकमल दाहाल प्रचण्ड, नेपाली कांग्रेसया सभापति शेरबहादुर देउवा, नेकपा (एकीकृत समाजवादी) या अध्यक्ष माधवकुमार नेपाल, लोकतान्त्रिक समाजवादी पार्टीया अध्यक्ष महन्थ ठाकुर, नागरिक उन्मुक्ति पार्टीकी अध्यक्ष रञ्जिता श्रेष्ठ, जनमत पार्टीया अध्यक्ष डा.चन्द्रकान्त (सीके) राउत, निर्वाचन आयोगया आयुक्तपि नाप थीथी राजनीतिक दलया नेता व कार्यकर्तापिनिगु ब्बति दुगु खः।

थौं जुगु राष्ट्रपतिया निर्वाचनय् गुगू दलपाखे राष्ट्रपतिया उम्मेदवार जूम्ह नेपाली कांग्रेसया वरिष्ठ नेता पौडेलं ३३ हजार ८ सय २ व प्रतिस्पर्धी सुवासचन्द्र नेम्वाङं १५ हजार ५ सय १८ मतभार काःगु खः।

Categorized in राष्ट्रिय