लहनाय् छगू दशक यात्रा
सुरेन्द्रभक्त श्रेष्ठ | चिल्लागा सप्तमी ११४३, फागुन ३० मंगलवाः
थनिं झिदँ न्ह्यः अर्थात २०७० फागुण २७ गते मंगलवाः कुन्हु लहनाया लोकार्पण जूगु न्हि खः। नेपालभाषा ख्यलय् म्ह्वः जक पत्रपत्रिका पिदनाच्वंगु इलय् छगू शाहस व जोश ज्वनाः जिमिगु छगू पुचलं आँट यानाः लहना पत्रिका पिथनागु खः। जिमित व्यवसायिक पत्रिका थौंया आवश्यकता नारा कथं पत्रिका पिकाय्त दक्कले अप्वः ग्वहालि व हःपाः बियादीम्ह समाजसेवी सुर बहादुर श्रेष्ठजु खः । वय्कलं पत्रिका लोकार्पण ज्याझ्वः याय्त छगू पार्टि प्यालेसय् लञ्चया व्यवस्था यानादिल। थुकथं पत्रिकाया शुरुवाट जूगु खःसा नेपालभाषाय् छगू रंगिन पत्रिका कथं थौंतक सकल नेवाःतय्गु न्हाय् तयेत नं ताःलाःगु दु।
झिदँतक निरन्तर थुगु हे भ्वँतय् कलर पत्रिका कथं पिथनेफुगु धैगु हे छिकपिनिगु हःपाः व तिबलं हे खः। लहना पत्रिकाया बुन्हिकुन्हु दँय्दसं खुगू सिरपा बियावयाच्वनागु नं छगू दसि खः। लाखा छेँया प्रोप्राइटर लक्ष्मण गमालजुपाखें वय्कःया मांअबुया नामं लहना धर्ममोति पत्रकारिता सिरपा नीस्वनाः लहनाया सम्मानया श्री गणेशाय नमः यानादीगु खःसा निदँ बुदिं थ्यंबलय् सुर बहादुर श्रेष्ठ पाखें लहना सुर सम्मान धकाः सिरपाः वियागु खः। अथे हे, प्यदँ वुदिंकुन्हु पञ्चवीर सिं तुलधार पाखें लहना पञ्चवीर सिरपा बीत जिपिं ताःलाःगु खः । अथे हे, न्यादँ बुदिंबलय् न्यू जेनिथ ईङ्गलिस मोडल स्कुलया प्रिन्सिपल राजु महर्जनपाखें लहना न्यू जेनिथ पत्रकारिता सिरपाया नापं प्रकाशक नृपेन्द्रलाल श्रेष्ठया मांबाःया नामं छगू सिरपा थप जूगु खः। केशवलाल कृष्णवदन पत्रकारिता सिरपाः, अथे हे मोहनी श्रेष्ठपाखें लहना मोहिनी पत्रकारिता सिरपालिसें खुगू सिरपाः निरन्तर थौंतक नं बियावयाच्वनागु दु । थुकिं याना थीथी विधाया पत्रकारिता यानाच्वनादीपिनिगु हौसला नं थहांवनाच्वंगु दु ।
लहना २०७० फागुन २७ गते थुगु पत्रिका न्हापांगु ल्याः पिदंगु खःसा १० ल्याः पिदनेधुंका छगू समीक्षा वैठक च्वनागु खः । उगु वैठकय् झायादीपिं सकलसिनं छगू हे म्हुतुं ‘थ्व पत्रिका पिदंगु तसकं बांलाः तर भ्वं छता मेगु हे तयादिसँ थुगु भ्वं तसकं थिकेय् । उकिं छिकपिन्सं थुगु पत्रिका निरन्तर पिकयादीगु खःसा मेगु हे भ्वं तयादिसँ मखुसा छिकपिनिगु रहर जुइ’ धकाः धयादीगु खः । अले जिमिसिं छता हे खँ जक धयागु खः ‘छिकपिन्सं ब्यूगु सुझाव तसकं बांलाः तर जिमिसं थुगु पत्रिका थथे हे कलर व थुगु हे आर्ट पेपर भ्वँतय दछितक निरन्तर पिथने । जिमित थाकुल धाःसा हाकनं छकः छिकपिंलिसे च्वनाः थथे हे सल्लाह कयाः भ्वं मेगु हे तय्’ धकाः बचं व प्रतिवद्धता प्वंकागु खः । तर थ्व लहना पत्रिका पिदंगु दछि जक मखु, झिदँ पूवनं नं व हे आर्ट पेपरय् रंगीन कलेबरय् हे पिदनाच्वंगु दनि ।
लहना पत्रिकाया मेगु छगू विशेषता धैगु दथुइया पानाय् पिदनीगु ब्लो अप खः। थ्व हे ब्लो अप लहना पत्रिकाया पहिचान जूगु दु। थुकिं यानाः यक्व नेवाःत छु विधाय् वःम्ह धकाः सीकेगु माध्यम जुइत ताःलाःगु दु । अथे हे मिसन पत्रकारिता याय्माः धइगु मान्यता थुगु पत्रिकां शुरुवात यानागु खःसा थ्व न पूवंकेत जिपि सकल पुचः ताःलाःगु दु । इलय्ब्यलय् थीथी इस्यूलय् बुखं पिथनागु नं सकलसिनं स्यूगु हे जुल ।
जिमित विश्वास यानाः ग्वहालि निरन्तर जुयाच्वंगुलि जिपि तसकं लय्ता । जिं २४ दँ न्ह्यःनिसें बजार व्यवस्थापनया ज्या यानावयाच्वनागुलिं यक्व मनूतनापं स्वापू दुगुलिं थुगु पत्रिका पिकाय्त व छुं नं ज्याझ्वः याय्त थाकु मजू । समुद्रय दुहां वनाः गथे यानाः हिरा माला हय्माः धइगु अनुभव दुगुलिं छुं नं ज्या याय्त अलमल मजू । नापं सरकारी प्रशासन नापं यक्व स्वापू दुगुलिं विज्ञापनत काय्त नं थाकु मजू, उमिगु लिस्टय् दुगुलिं फोन यानाः हे विज्ञापन काय्त सःताहइ । अन्त्यय् थुगु लहना पत्रिका पिकाय्त सकलसित नं थुकथं हे ग्वहालि, हःपाः व तिबः बियाः थुकथं हे निरन्तरता बीत ग्वहालि यानादी धइगु भलसा कासें सकलसित निपाः ल्हाः प्यपुंकाः नमन यानाच्वना।
