२०८१ बैशाख १०, सोमबार

नेपाः विश्वकप छनोटय्

राम डंगोल | चिल्लागा नवमी ११४३, चैत्र २ बिहीवाः

आइसिसी विश्वकप लिग २ थौं बिहिवाः जूगु कासाय् युएईयात बुकाः नेपाः तप्यंक विश्वकप छनोटय् दुहां वंगु दु। किपूया त्रिवि मैदानय् जूगु कासाय् नेपालं डकवर्थ लेविसया आधारय् युएईयात निगू रनं बुकूगु खः।

मौसम बांमलानाः खिउँया वःगुलिं कासा दिकाः डकवर्थ लेविस आधारय् कासाया निर्णय जूगु खः। कासा त्याकेगु निंतिं युएई बिउगु ३११ रनया विशाल लक्ष्य ज्वनाः म्हिताच्वंगु नेपालं ४४ ओभरय् ६ विकेटया क्षतिइ २६९ रन दयेकूगु इलय् द्यः खिउँया वयाः म्हितेमफइगु जूगुलिं कासा दिकाः डिएल नियमया आधारय् कासाया निर्णय याःगु खः।

उगु इलय् नेपाःया निंतिं ५० रन दयेकेधुंकूम्ह गुलझन झा व १० रन दयेकाः दीपेन्द्र ऐरी क्रिजय् दुगु खः। नेपाःया विजयया निंतिं भीम सार्किं ६७ रन, आरिफ शेखं ५२ रन, कुशल भुर्तेलं ५० रन, कप्तान रोहित पौडेलं १६ रन व कुशल मल्लं ५ रनया योगदान बिउगु खः। युएई निंतिं जुनैद सिद्धिकं स्वंगू विकेट काःगु खः।

टस त्याकाः न्हापां ब्याटिङ याःगु युएई ५० ओभरय् ६ विकेटया क्षतिइ ३१० रन दयेकूगु खः। एकदिवसीय क्रिकेटय् नेपाःविरुद्ध दयेकूगु थ्व आःतकया दकलय् उच्च योगफल खः।

युएईया निंतिं आसिफ खानं ४२ बलय् १०१ रनया अविजित पारी म्हितूगु खःसा वृत्य अरबिन्दं ९४ रनया योगदान बिउगु खः।

नेपाःया निंतिं दीपेन्द्रसिंह ऐरीं २, ललितनारायण राजवंशी, सोमपाल कामी व सन्दीप लामिछानें छगू छगू विकेट काःगु खः।

Categorized in कासा