२०८० चैत्र १६, शुक्रबार

लहना वाःपौया छगू दशक

काजी रत्न | चिल्लागा आमै ११४३, चैत्र ७ मंगलवाः

लहना वाःपौ थौं झिदँ पूवनाः झिंछदँ क्यंगु दु । धाधां लहना वाःपौया छगू दशक पूवन खनी । पत्रिका पिदंगु म्हिगः तिनि थें च्वं । ई गुलि याकनं न्हयाःवन खनी, छगू दशक गुलि याकनं थ्यन खनी । खः, छगू दशक, अर्थात झिदँ याकनं वन थें ला जूगु खः । तर थ्व छगू दशक उलि अःपुक वंगु धाःसा मखु ।
 
यक्व हे हाथ्या, पंगःत चीकु चीकुं थौंया दिंतक थ्यंगु खः । गुलिखय् हाथ्या ला झीस नेपाःमि दक्वसिनं फया, गुलिखय् समस्या सकल हलिमं हे फय्माल । गुलिं हाथ्या व समस्या धाःसा लहनां थःगु हे दुने हे सुचुकाः थःगु न्ह्यूख्वाः सकसिगु न्ह्यःने ब्वयाच्वन । थज्याःगु अवस्थाया दथुइ छगू दशक पूवनेत छिकपिनिगु हःपाः तिबः मदय्कं पक्कां थाकुइगु खः । पाठक, विज्ञापनदाता, स्तम्भकार, संवाददाता लिसें थीथी कथं लहनायात साथ बियादीपिं, लहनाया हरेक पलाःलिसे नापनापं पलाः न्ह्याकूपिनिगु सहकार्य, सामूहिक कुतलं
थौं धाय्दयाच्वन, लहनाया छगू दशक पूवन ।
 
थ्व छगू दशक दुने झीसं ७२ सालया भुखाय् स्वया । भुखाचं सकलसित थःथःगु छेय् नं पितिनाबिल । अरबपति, करोडपतियात नं सकडया बाय् यानाबिल । उगु ई लहनाया नितिं नं तसकं थाकूगु ई खः । गनं जुइबलय् हे ग्याग्यां जुइमाःगु व ई । उगु इलय् ला सकसितं छेँय् नं पिने तयाबिल । तर सन् २०१९ य् वयाः धाःसा सकलसित छेँय् छेँय् हे कुनाबिल । छेँय् नं पिहांवय्त, सुनां सुइतं नापलाय्त नं बिचाः याय्माःगु, ग्याय्माःगु ई वल । उगु इलय् पत्रिका पिकाय्त गुकथं पिकाय्गु ? पत्रिका पिहां हे वःसां गुकथं सकलसिगु छेँय् थ्यंकेगु ? जबकि पिनं वःम्ह मनूयात नापलाय्त सकलें ग्यानाच्वंगु ई । उबलेनिसें झीसं माध्यम हिलाः हे जूसां सूचना व समाचार प्रवाह याय्गु ज्या मदिका । छुं ई पत्रिका दिकेमाःगु जूसां टेलिभिजनया पर्दां झीसं लहना गतिविधि न्ह्याकाः समाचार सम्प्रेषण, आम नागरिकयात सुसूचित याय्गु ज्या याना । 
 
थ्व छगू दशकया दुने झीसं सूचना व समाचार सम्प्रेषणया ज्या जक मखु, संचार ख्यलय् थःत पानाच्वंपिं पत्रकार, संचारकर्मीनिसें कलाकारतय्त नं प्रोत्साहित याय्गु ज्या याना । थीथी सम्मान व पुरस्कारलिसें पत्रकारतय्त सम्मानित याय्गु नितिं यक्व हे व्यक्ति व संस्थाया साथ व ग्वहालि दुगु नं न्ह्याबलें लहनाया नुगलय् दु । अथेहे, जनकवि दुर्गालाल श्रेष्ठया म्येय् जगतसुन्दर ब्वनेकुथिया विद्यार्थीतय् हुलाप्याखं न्ह्यब्वयाः जगतसुन्दर दबू ज्याझ्वः यानागु, थौं झीगु दथुइ मदय्धुंकूम्ह गोल्डन भ्वाइस प्रेमध्वज प्रधानया सम्मान ज्याझ्वः यानागु व ऐतिहासिक ई नं थौं लहनाया छगू दशक पूवंगु दिनय् लुमंकाच्वना ।
 
नेपालभाषाया पत्रकारिता ख्यलय् छगू क्रान्ति हय्गु, न्हूगु आयाम तनेगु ताः तयाः पिदंगु लहना वाःपौ थौंया दिनतक्क थ्यंबलय् यक्व हदतक्क थःगु आज्जुइ ताःलाःगु दुसा गुलिखय् थासय् कमी कमजोरी मदुगु मखु । झी सकल जानाः थ्व स्वयां अप्वः यानावनेमानी । झीगु यात्रा थुलिं क्वचाइमखु । झासँ झी सकलें जानाः नेवाः पत्रकारिता ख्यलय् न्हूगु जोशलिसें न्ह्याःवने । झीगु लहनायात अझ धिसिलाक्क न्ह्याकायंके ।