२०८० चैत्र १६, शुक्रबार

नेपाःया क्रिकेट टीमपाखें नेपाःयात निगू लसता छक्वलं

प्रजित शाक्य | चौलाथ्व चौंथी ११४३, चैत्र ११ शनिवाः

विश्व क्रिकेटय् नेपालं तःगु हे उपलब्धि हासिल याःगु दु । न्हापा टेस्ट मम्हितूगु राष्ट्र दथुइ नेपाल शीर्ष थासय् लानाच्वंगु टिम नं खः । नेपालं विश्वकप टि–ट्वान्टी नं म्हितेधुंकूगु दु । विश्वकपय् नेपालं न्हापांगु ब्वतिइ हे स्वंगू मध्ये निगू कासाय् दुर्लभ जित ल्हातय् लाकूगु खः । व धुंकाः अन्तर्राष्ट्रिय टि–ट्वान्टीया मान्यता व एकदिवसीय मान्यता नं चूलाकल । सन् २०१८य् नेपालं न्हापांगु खुसी एकदिवसीय अन्तर्राष्ट्रिय मान्यता चूलाकूगु खः ।
 
नेपाली क्रिकेट टिमं थ्व हे वालय् निगू लसता ब्यूगु दु । एकदिवसीय मान्यता थप प्यदँया लागिं ल्यंकाः  विश्वकप एकदिवसीयया ल्यज्याय् स्वतः चयन जुल ।
 
विश्वकप छनोटय् स्वतः चयन
लछि न्ह्यःतक नेपालं आइसीसी विश्व क्रिकेट लिग २ या स्वंगूगु थासय् च्वनाः विश्वकप क्रिकेट ल्यज्या म्हितेगु सम्भावना खंपिं सखे हे दुगु खइ । कारण, नेपाल १२ कासा जक म्हिते ल्यं दनिगु स्थितिइ ल्यूनं छगू जक त्वाथः च्वय् दुगु खः । नेपालं सुरुया २४ कासामध्ये च्यागू त्याकूगु खः । व इलय् घरेलु क्रिकेट स्पट फिक्सिङं नकारात्मक चर्चाय् वयाच्वंगु खः । सन्दीप लामिछानेयात बलात्कारया मुद्दा नं न्ह्यानाच्वंगु खः । व आइसीसी विश्व क्रिकेट लिग २ लिपांगु कासाय् नेपालं बिहिबाः संयुक्त अरब इमिरेट्स (युएइ) यात डकवर्थ लुइस नियम कथं ९ रनं बुकाः असम्भवयात सम्भव दय्काबिल । नेपाल लिपांगु १२ मध्ये ११ कासा त्याकाः विश्वकप छनोटय् स्वतः थ्यनेत योग्य जुल । गुगु नेपाली क्रिकेटय् चमत्कार नालाकाःगु दु । च्याम्पियन
स्कटल्यान्ड व निगूगु थासय् दुगु ओमान थुगु धेंधें बल्लाखं जिम्बाब्वेय् जुइगु विश्वकप छनोटय् थ्यंगु मेगु निगू टिम खः ।
 
नेपालया लागिं लिपांगु कासा युएइं लिपांगु कासाय् न्हापां ब्याटिङ यानाः ३१० रनया विशाल योगफल तयार यानाः नेपालया विश्वकप छनोटय् स्वतः दुहांवनेगु लँ थाकुका नं बिल । लिपांगु कासा त्याकूसा नेपाल विश्वकप छनोटय् स्वतः थ्यनीगु समीकरण जूगु जुयाः नेपालयात लिपांगु कासा त्याकेत इतिहास दय्केमाःगु खः । युएइं दय्कूगु रन एकदिवसीय क्रिकेटय् नेपालविरुद्धया आःतक्कया हे उच्च स्कोर खःसा नेपालं आःतक्क थुलिमछि रनयात लिनाः त्याकूगु मदुनि ।
 
तर कुशल भुर्तेल, भीम सार्की, आरिफ शेख व गुल्सन झाया अर्धशतकीय पालिया ग्वहालिइ नेपालं त्याकल । नेपालयात जित नाटकीय रुपं प्राप्त जूगु खः । नेपालं आज्जु लीगु झ्वलय् ४४ ओभरय् ६ विकेट तंकाः २६९ रन दयेकूबलय् अपर्याप्त प्रकाशया हुनिं कासा द्यूगु खः । व धुंकाः हाकनं कासा न्ह्याकेत सम्भव मजुइगु धासें डकवर्थ लुइसया लिधंसाय् निर्णय यात । गुकी नेपाल ९ रनं न्ह्यःने दुगु खः व नेपालया विश्वकप एकदिवसीय छनोटय् स्वतः थाय् दय्केगु म्हगस पूवन ।
 
आः वइगु जुन–जुलाईलय् जिम्बाब्वेय् जुइगु विश्वकप छनोटय् नेपालं म्हिती । गुगु धेंधें बल्लाखय् नेपालं आःतक्कया हे दकले उच्च झिगू टिमतलिसे धेंधें बल्लाः याइ । विश्वकप छनोटय् वेस्टइन्डिज, श्रीलंका व दक्षिण अफ्रिकामध्ये निगू टिम नं दइ । मेगु टिमय् जिम्बाब्वे, आयरल्यान्ड व नेदरल्यान्ड्स दु । थ्व बाहेक थ्व हे लाय् नामिबियाय् खुगू राष्ट्र दथुइ जुइगु प्लेअफय् शीर्ष निगूगु थासय् लाइगु टिमत नं विश्वकप ग्लोबल छनोट म्हितेत योग्य जुइ । थ्व विश्वकप छनोटं निगू टिम भारतय् जुइगु एकदिवसीय विश्वकपय् म्हितेत चयन जुइगु प्रावधान दु ।
एकदिवसीय मान्यता निरन्तर
 
आः नेपाली क्रिकेटं थ्व हे वालय् ब्यूगु मेगु लसताबारे चर्चा याय् । आइसीसी विश्वकप क्रिकेट लिग २ अन्तर्गत जूगु त्रिदेशीय श्रृंखलाय् आइतबाः संयुक्त अरब इमिरेट्सयात १७७ रनं बुकेधुंकाः नेपालया एकदिवसीय मान्यता पक्का यात । थ्व जितलिसें अमेरिकायात ल्यूने घ्वानाः नेपाल प्यंगूगु थासय् थहांवंगु खः । आइसीसीया नियम कथं थ्व धेंधें बल्लाःया शीर्ष न्यागुलिइ लाइगु टिमया एकदिवसीय अन्तर्राष्ट्रिय मान्यता पक्का जुइगु प्रावधान दु । अझं निगू कासा म्हिते ल्यं दुगु अवस्थाय् नेपालया म्ह्वतिं शीर्ष चार पक्का यात । नेपालं निगू कासा
म्हिते ल्यंदनिबलय् न्हय्गू राष्ट्र दुथ्याःगु उगु धेंधें बल्लाखय् शीर्ष चार पक्का याय्धुंकाः नेपालया एकदिवसीय अन्तर्राष्ट्रिय मान्यता ल्यंगु खः ।
 
अन्तराष्टिय क्रिकेट काउन्सिल (आइसिसीं) क्रिकेट म्हितीगु राष्ट्रयात वर्गीकरणय् तःगु दु । टेस्ट क्रिकेट म्हितीगु १२ राष्ट्रयात स्थायी एकदिवसीय मान्यता बियातःगु दु । अस्ट्रेलिया, इङ्गल्यान्ड, न्युजिल्यान्ड, पाकिस्तान, वेस्ट इन्डिज, भारत, श्रीलङ्का, दक्षिण अफिका, जिम्बाब्वे, बङ्गलादेश, अफगानिस्तान व आयरल्यान्ड स्थायी एकदिवसीय मान्यताप्राप्त टिम खः । अथेहे, एसोसिएट टिममध्ये उत्कृष्ट प्यंगू टिमयात प्यदँया लागिं अस्थायी एकदिवस्ीय मान्यता बीगु प्रावधान दु ।
 
विश्व क्रिकेटय् एकदिवसीय मान्यता चूलाःगु चानचुन खँ मखु । एकदिवसीय मान्यतां विश्व क्रिकेटया एक उत्कृष्ट टिम खः धइगु हसना बी । छाय्धाःसा एकदिवसीय मान्यता चूलाःगु टिम एकदिवसीय वरीयताय् नं लाइ । उकिं बीगु प्रतिष्ठा, बांलाःगु छवि ला द हे दु । मेगु फाइदा नं दु । आइसीसी एकदिवसीय मान्यता चूलाइगु राष्ट्रयात दँय् करोडौँया बजेट फ्याइ । नेपाल थुज्वःगु राष्ट्रया लागिं थ्व मदय्कं मगाः । व धेबां नेपालया क्रिकेट विकासया लागिं मदय्कं मगाःगु स्तरीय प्रशिक्षक, अभ्यास, भ्रमण, खेलाडीया भत्ता, नियमित प्रशिक्षण थुज्वःगु ज्या याय्त अःपुइ । आः नेपालया लागिं थप प्यदँ अन्तर्राष्ट्रिय एक्सपोजर नं अप्वइ ।
 
सरकार व क्यानया भूमिका
 
नेपाली क्रिकेट टिमं थुज्वःगु लसता मेगु कासा व कासामिं ब्यूगु मदुनि । यद्यपि नेपाल सरकार व नेपाल क्रिकेट संघ (क्यान) या स्वयां प्रशिक्षक, कासामिया त्याग तपस्यां क्रिकेटय् ततःधंगु उपलब्धि प्राप्त जूगु खः धाइपिं नं दु । आन्तरिक विवादं नेपाल इलय्ब्यलय् आइसीसीं प्रतिबन्धित जूगु दु । आइसीसीं क्यानयात आर्थिक नियन्त्रण चीकूगु आपाः मदुनि ।
नेपाली क्रिकेटया प्रतिष्ठायात कायम तय्त क्यानं दकले न्हापां थःगु व्यवस्थापन बांलाकेमाः । छाय्धाःसा प्रशिक्षक व खेलाडीया जक उत्साह कुतलय् चूलाःगु सफलतां निरन्तर जुइ फइमखु । आःया सफलतायात ल्यंकातय्गु व थुकियात अझ च्वन्ह्याकायंकेगु हाथ्या दुगुलिं दीर्घकालीन योजनां क्रिकेट विकास याय्माः । थ्व हे हुनिं क्यानया भूमिका धइगु आः व्यवस्थापन पक्ष छधी जुयाः नेपाल क्रिकेटया विकासय् जाय्गु खः ।
 
नेपाल सरकारं नं क्रिकेट टिमया उपलब्धि न्ह्याबलें भजे याय्गु कुतः यानाच्वनी, बधाई ज्याझ्वः, थीथी सिरपाःया घोषणा यानाः । आःया सफलताय् नं क्रिकेटरतय्त बधाई व तका सिरपाःया वर्षा जुयाच्वंगु दु । थ्व बांमलाःगु ला मखु, तर सरकारं क्रिकेटया धात्थें प्रवद्र्धन याय्गु खःसा सरोकारवालातलिसे सहकार्य यानाः भौतिक संरचना, लगानी, अनुकुल वातावरण व घरेलु क्रिकेट संरचना बल्लाकेत ग्वहालि याय्माः । नेपाल सरकार व क्यानं आः हाथ्याया पहाड न्ह्यःने दु धइगु सीकेमाः । छाय्धाःसा सफलतायात निरन्तर यानातय्गु ज्या पक्का नं अःपूगु मखु ।