पूर्व मेयर विद्यासुन्दर शाक्यया कार्यकालय् क्वछिना तःगु योजनायात येँ महानगरपालिकां धमाधम कार्यान्वयन जुयावया च्वंगु दु।

महानगरपालिका दुने थीथी थासय् सीसीटिभी जडान व सञ्चालन यायेत नेपाल प्रहरीयात छु दिं न्ह्यः ६ करोड रुपैयाँ बिया सम्झौता न मेयर शाक्यया इलय् जुगु योजनाया निरन्तरता बिःगु दु।महानगरपालिका दुने सीसीटिभी जडान व सञ्चालन यायेत महानगरपालिकां नेपाल प्रहरीयात ६ करोड रुपैयाँ उपलब्ध याकूगु खः। नगरया शान्ति सुरक्षा, अपराध नियन्त्रण, दुर्घटना, फोहरमैला व्यवस्थापन, फुटपाथ अतिक्रमण, प्रदुषण, सार्वजनिक सम्पत्तिया उपयोग थे जाःगु शहरी सुशासन व महानगरपालिकाया कार्य सम्पादन यायेत सूचना प्रविधि प्रणालीइ आवद्ध याकेत महानगरपालिकां नेपाल प्रहरीयात उगु रकम उपलब्ध याःगु खः।

येँ महानगरया निवर्तमान मेयर विद्यासुन्दर शाक्यया पालय् येँ महानगर क्षेत्र दुने १६५ सिसिटिभि क्यामेरा जडान याय्धुंकूगु खः । २०७५ फागुन १५ गतेया दिनय् सिसिटिभि क्यामेरा जडान, संचालन, मर्मत सम्भार स सूचनाया उपयोग याय्त धासें येँ महानगरपालिका व महानगरिय प्रहरी परिसर येँ महानगर दथुइ सम्झौता जुयाः ज्या सम्पन्न तकं जुइधुंकूगु अवस्था खः ।

उगु इलय् ज्इा न्ह्याकेत धासें पेश्की कथं महानगरं प्रहरी परिसरयात ३ करोड तका उपलब्ध याकूगु खः ।४ करोड ४२ लाख ५७ हजार ६९३ तकाय् सम्झौता यानाः ज्या सम्पन्न जुइधुंकाः २०७६ फागुन २२ गते अपुग १ करोड ४३ लाख ४८ हजार ८१५ तका प्रहरी परिसरयात उपलब्ध याकूगु खः । आः जूगु सम्झौता ज्याझ्वलय् न्ववासें सूचना प्रविधि विभागया प्रमुख नमराज ढकालं उगु इलय् जूगु सम्झौता कथं जडान याःगु १६५ सीसीटिभी क्यामरामध्ये आः १५८ चालु अवस्थाय् दुगु जानकारी बियादीगु दु । न्हय्गः क्यामेरा धाःसा सडक विस्तारया झ्वलय् प्रयोग विहिन जूगु ढकालं धयादिल ।

थ्व जक मखु, मेयर शाहं मेमेगु ज्याय् नं तत्कालीन मेयर शाक्यया हे पालय्या योजना व सम्झौतायात जक निरन्तरता बियावःगु खनेदु । थ्वयां न्ह्यः नं मेयर बालेन निर्वाचित जुयाः वय्धुंकाः दमकल हःबलय् उगु इलय् विद्यासुन्दर शाक्यं हय्मफूगु दमकल बालेनं हल धयाकथं प्रचार जूगु खः । इन्डोनेशीयन कम्पनीलिसे २०७८ श्रावण ३ गते जूगु सम्झौता कथं खरिद याःगु स्वंगः दमकल हे मेयर बालेनया पालय् थ्यंकः वःगु खः । ‘उगु इलय् सम्झौता, खरिद प्रकृया दक्वं जुयाः दमकल नेपालय् वइगु निश्चित हे जुइधुंकूगु खः ।

तर कोरोना महामारी, लकडाउन थज्याःगु परिस्थितीं यानाः दमकल नेपाल थ्यंकः वय्मफूगु खः । आः स्थिती सामान्य जुयावःगुलिसें दमकल थ्यंकःवःगु खः’ येँ महानगरया निवर्तमान मेयर शाक्यं धयादिल । अथे हे, फायर हायड्रेन्टया सवालय् नं येँ महानगरया भित्री बस्तीलिसें पिनेया बस्तीइ तकं थीथी थासय् जडानया ज्या जुइधुंकूगु दु । येँ महानगर दुने विशेष यानाः गल्ली गल्ली अप्वः दुगु थासय्, दमकल काचाक्क दुहांवने मफइगु थासय् उगु इलय् फायर हायड्रेन्टया ज्या जूगु खः । थ्व हे ज्यायात मेयर बालेनं निरन्तरता बियाः न्ह्याकायंकल ।

येँ महानगरया सडकय् स्मार्ट सडक मत जडानया ज्या नं न्हापा हे जुयाच्वंगु ज्या खः । तर आः प्रचार प्रसार धाःसा थज्याःगु दक्वं ज्या बालेन निर्वाचित जुयावय्धुंकाः जक जूगु थें जुयाच्वंगु दु । आः थुकथंया प्रचार प्रसार नं मेयर बालेनया हे निर्देशन वा योजना कथं जुयाच्वंगु खः वा संचारमाध्यमयाके हे पूवंक सूचना मदुगु खः ? ‘बांलाःगु ज्या जूसा जिं यानागु, ज्या पूमवन वा सफल मजुल धाःसा मेपिन्त दोष बीगु मानवीय स्वभाव हे धाःसां ज्यू । थुकियात स्वाभाविक रुपं काय्माः थें ताः । मनूत सहि सूचना बीमाः, भ्रमित याय्मज्यू ।

आः उकथंया प्रचार प्रसार छाय् थुकथं जुल धकाः जिं गुकथं धाय् ?’ निवर्तमान मेयर शाक्यं धयादिल । ज्या याय्गु, ज्या जूगु, जुयाच्वंगु पक्कां बांलाः । सुनां यात धइगु नं तःधंगु खँ मखु । येँ महानगरया आवश्यकता कथंया ज्या, येँ महानगरया विकास महत्वपूर्ण खँ खः । तर भ्रमित याय्गु गलत सूचना सम्प्रेषणं विगत व इतिहास हुइगु ज्या नं जुइमज्यू धइगु खँय् सचेत जुइमाः ।

Categorized in राष्ट्रिय