हलिमय् नम्बर वान जुल
लहनान्युज | बछलागा पारु ११४३, बैसाख २३ शनिवाः
का, सकल यमितयत् बधाई दु । यमितय्त जक मखु, येँलिसे स्वानाः च्वनाच्वंपिं यलय् व ख्वपय्तय्त नं बधाई दु । छुं खँय् ला झी हलिमय् नम्बर वान जुल । मेगुलिइ मखुसां हलिमय् दकले प्रदुषित शहरया रुपं येँ अथवा काठमाडौंया नां च्वन । प्रदुषणय् सां हलिमय् नम्बर वान जुल, आः झीत बधाई दु धाय् का । खतुं हलिमय् नम्बर वान जुइत येँय् मेमेगु पक्षत वा वस्तुत मदुगु मखु । थनया मूर्त, अमूर्त सम्पदा हे हलिमय् नम्बर वान जुइफुगु खः । थनया मौलिक आदिवासी सीप, लजगाः हलिमय् नमूना जुइफुगु खः । तर झी जुल प्रदुषणय् नम्बर वान ।
येँ प्रदुषित जुयाच्वंगु धयागु आः हे जक नं मखु । ताः ई न्ह्यःनिसें थनया प्रदुषणयात कयाः हलिमय् चर्चा जुयाच्वंगु दुगु खः । तर थुगुसी धाःसा झीसं दक्वसित हे लिफ्यानाबिया अले प्रदुषित शहरय् नम्बर वान हे जुयाबियाः । मस्यु झी मेयर सापयात थ्व खँया जानकारी दतला मदु ला ? कि वय्कः फेसबुकय् स्टाटस अपडेट याय्गुलिइ हे व्यस्त खः ? वय्कःया ला स्टाटस अपडेट यायां मलाः थें च्वं । वय्कःया येँ महानगर हलिमय् दकले प्रदुषित शहर जुल धकाः वय्कःयात टाय्ग यानाः स्टाटस छगू तय्लाकि छु ?
थथे धाय्बलय् हाकनं वय्कःया समर्थकतय्सं म्हुतु हे वाय्त बेर मदु न्हां । युवा नेतृत्व धाःपिनि समर्थक ला ग्यानापुस्से च्वं । युवा नेतायात छुं ब्वःबीगुला छु सल्लाह जक ब्यूसां दक्वं मुनाः म्हुतु वाः वय्त बेर मदु । वय्कःपिन्सं मेयर साप ला आः हे तिनि निर्वाचित जुयावःगु धाइ जुइ । तर वय्कः मेयर साप निर्वाचित जुयावःगु दछि दइन । थ्व दछिया उपलब्धि छु ले धकाः आइग्लास ज्वनाः मालेमाःगु अवस्था दु । इन्जिनियर थज्याःम्ह मेयर जुयावःबलय् विज्ञान व प्रविधिया साथ कयाः थनया समस्याया दीर्घकालीन समाधानपाखे यंकी जुइ आः धकाः यक्वसिनं आशा याःगु खः । तर वय्कःया ला फेसबुक स्टाटसय् तक्यनाच्वंगु खनेदु । डोजर ज्वनाः थौं गन छु थुंवने धकाः जकं बिचाः यानाच्वन ला ? कि यमबुद्धया शालिक दय्कः वनाच्वन ?
आः मेपिन्त गुलि ब्वः बीगु हला ? म्वाःल, मेयर साप वा मेपिन्त ब्वः बियाच्वनेगु त्वःते । आः सुनां छु याइ धकाः बिचाः मयाःसे थम्हं छु याय्गु बिचाः याय्नु । जि याकःचां यानाः छु जुइ नं मधाय् । जिं हे शुरु याय् धाय्नु । आः कम से कम वालय् छन्हु थःगु नीजि सवारी साधन मछ्यःसे साइकल अथवा सार्वजनिक सवारी छ्यले ला ? ध्वगीगु फोहरयात साः दय्काः गमलाय् तय्ला, उकियात छेँखापतिं कम्पोस्ट बिन छगः तय्ला ? ध्वमगीगु फोहोरयात गुकथं ज्यू पुनः प्रयोगय् यंकेला ? थुलि याय् फःसा झीगु येँया प्रदुषण क्वपालेत ग्वहालि जुइला ?
