निगुगु जनआन्दोलनय् घाःपाः जुम्ह काभ्रेका मुकेश कायस्थ मन्त।

‘म्वाम्ह शहीद’ धका म्हसिउम्ह कायस्थ बनेपाया शिर मेमोरियल अस्पतालय् वासः यायेगु झ्वलय् म्हिगः बुधवाः बहनि मदुगु खः। २०६२ चैत २७ गते जूगु आन्दोलनय् कायस्थयात छ्यनय् सुरक्षाकःमिपिन्स गोली क्यकूगु खः।

उगु इलय् वयकः १४ दँ निति दुम्ह खः। वयकः ३२ दँय् म्हिगः मदुगु खः। कायस्थयात थौं विहीवाः अन्तिम संस्कार याइ धका मुकेश कायस्थ प्रतिष्ठानया अध्यक्ष हिरा शर्मा नेपालं जानकारी बिःगु दु।

बनेपा नगरपालिका वडा नम्बर ८ य् च्वम्ह वयकः मुकेश २०४८ साल भदौ ९ गते बुम्ह खः। २०७५ असारय् आकाझाकां बिरामी जुइवं हाकनं अर्धचेत अवस्थाय् थ्यःगु खः। ताः ईनिसे शिर मेमोरियल अस्पतालय् वासः यानाच्वम्ह वयकः म्हिगः बहनि ७ः३० बजेमदुगु खः।

सरकारं  वयकःयात उपचार खर्च, १५ हजार मासिक भत्ता, छम्ह सुसारेया लागि ६ हजार २ सय भत्ता व छम्ह नर्स नियमित उपलब्ध याना बिःगु खः।

Categorized in राष्ट्रिय