स्मार्ट एरोविक्स, स्मार्ट बचत तथा ऋण सहकारी संस्था व भिसा एलायन्सया मंकाः ग्वसालय् छगु हिदान ज्याझ्वः जूगु दु।

विश्व रक्तदाता दिवसया लसताय् ब्लड डोनर्स एसोशियसनया इनापय् छगु हिदान ज्याझ्वः जूगु खः। उगु ज्याझ्वलय् येँ क्षेत्र नं. ७ या प्रतिनिधिसभा सदस्य गणेश पराजुली, मानुषी यमी भट्टराई व गायक रमेश कुमार विश्वकर्मा लगायत १४१ म्हेसिया हिदान याःगु खः।

स्मार्ट एरोविक्सया अध्यक्ष निर्मल महर्जनया अध्यक्षताय् जूगु उगु ज्याझ्वलय् ब्लड डोनर्स एसोशियसनया राष्ट्रिय अध्यक्ष ई. सानु बाबु प्रजापति मूपाहाँ कथं झायादीगु खः। स्मार्ट एरोविक्सया सल्लाहाकार केदार दवाडी लसकुस यानादीगुलि प्रशिक्षक लीला भण्डारीं सुभाय् देछानादीगु खः।

संस्थाया सचिव उत्तम कुमार श्रेष्ठं न्ह्याकादीगु खः।

Categorized in राष्ट्रिय