तथ्यांक विभागं सार्वजनिक याःगु लिच्वःयात कया बिरोध
लहनान्युज | तछलागा चतुर्थी ११४३, जेठ २४ बुधवाः
वंगु जेठ १९ गते राष्ट्रिय तथ्यांक विभागं सार्वजनिक याःगु राष्ट्रिय जनगणना २०७८ या जाति, भाषा व धर्म सम्बन्धी लिपांगु लिच्वःयात कयाः आदिवासी जनजाति संघसंस्थातय्सं असन्तुष्टि प्वंकूगु दु ।
तथ्यांक विभागं जारी याःगु जाति, भाषा व धर्मसम्बन्धी लिच्वः वास्तविक व विश्वसनीय मजू धासें उकियात भिंकेत इनाप नं याःगु दु । नेपाल आदिवासी जनजाति महासंघ लिसे जातीय संघसंस्थां उगु लिच्वः तत्काल भिंकाः आदिवासी जनजाति उत्थान राष्ट्रिय प्रतिष्ठान ऐन–२०५८ या अनुसूची कथं आदिवासी जनजाति संगठनत व आदिवासी जनजाति आयोगया सुझावयात मू आधार दयेकाः हाकनं सार्वजनिक यायेत इनाप याःगु दु ।
उगु मंकाः विज्ञप्तिइ धयातःगु दु, ‘तथ्यांक कार्यालयं जारी याःगु जाति, भाषा व धर्मया महलय् वःगु तथ्यांक वास्तविक व विश्वसनीय मजूगुलिं थ्व लिच्वःयात अस्वीकार यानाच्वना । नियोजित रुपय् याःगु थ्व भ्रामक तथ्यांकयात तत्काल भिंकाः आदिवासी जनजाति उत्थान राष्ट्रिय प्रतिष्ठान ऐन–२०५८ या अनुसूची कथंया आदिवासी जनजाति संगठनत व आदिवासी जनजाति आयोगया सुझावयात मू आधार दयेकाः हाकनं विवरण सार्वजनिक यायेत जिमिसं नेपाल सरकार व राष्ट्रिय तथ्यांक कार्यालय समक्ष जोडदार माग यानाच्वना ।
तत्काल थ्व लिच्वः मभिंकल धाःसा निर्णायक आन्दोलनं फैसला जुइगु खँ नं उद्घोष यानाच्वना ।’ आदिवासी जनजाति उत्थान राष्ट्रिय प्रतिष्ठान ऐन–२०५८ स दुगु सूचीकृत जातियात तछ्यानाः जाति दुनेया थरयात हे बिस्कं जातिया रुपय् तथ्यांक सार्वजनिक याःगु धासें नेपाल आदिवासी जनजाति महासंघय् दुथ्याःपिं आदिवासी जनजातीय संगठनं गम्भीर ध्यानाकर्षण याकूगु खः ।
विज्ञप्तिइ आदिवासी जनजाति महासंघया नायः गेल्जे लामा शेर्पा, नेपाल मगर संघया अध्यक्ष ज्ञानेन्द्र पुनमगर, किरात राई यायोक्खाया अध्यक्ष जीवन हाताचो राइ, तमु ह्यु छोंज धि गुरुङ राष्ट्रिय परिषद्या उपाध्यक्ष धनमान गुरुङ, नेवाः देय् दबूया महासचिव सत्यनारायण डंगोेल, भुजेल समाज सेवा समितिया अध्यक्ष खमेराज भुजेलं हस्ताक्षर यानातःगु दु ।
उकथं हे नेपाल बोटे समाजया दुजः इन्द्रप्रसाद बोटे, दुरा सेवा समाजया सचिव दिलु दुरा, नेपाल चेपाङ संघया महासचिव सन्तबहादुर चेपाङ, नेपाल कुमाल समाज सुधार समितिया उपाध्यक्ष श्रुती कुमाल, नेपाल छन्त्याल संघया उपाध्यक्ष यमुना छन्त्याल, तोप्केगोला समाज सेवा समितिया दुजः लाक्पा शेर्पा, सुनुवार सेवा समाज संघीय समितिया अध्यक्ष अमृतबहादुर सुनुवारं नं हस्ताक्षर यानातःगु दु ।
Categorized in राष्ट्रिय
