मंकाः खलःया भवन
लहनान्युज | दिल्लागा तृतीया ११४३, असार २१ बिहीवाः
खय् भाषाय् छगू धापू दु, ‘काम गर्ने कालु, मकै खाने भालु ।’ थन सुइतं कालु वा सुइतं भालु धइगु उपमा बीगु उद्देश्य मखु । मात्र थ्व धापूया अर्थयात जक न्ह्यब्वय्गु उद्देश्य खः । थुगु धापुतिं छम्हेसिनं याःगु ज्याया जस मेम्हेसिनं नय्त स्वःगु धाय्त स्वयाच्वंगु खः । थ्व धापू थौंकन्हय् आम सर्वसाधारणं येँ महानगरपालिकाया मेयर बालेन शाहप्रति संकेत यासें धाय्गु यानाच्वंगु दु । खतुं छगू सन्दर्भय् मेयर बालेनयात थथे धाय्गु यानाच्वंगु नं मखु । तर थौंकन्हय् धाःसा नेपालभाषा मंकाः खलःया भवनयात कयाः विशेष यानाः नेवाः समुदायं बालेनयात थथे हे धयाच्वंगु दु ।
अमेरिकां संचालन जुयाच्वंगु अनलाइन मिडिया हरपलय् मंकाः खलःया भवन बालेनं दय्कूगु धकाः भिडियो सामग्री सम्प्रेषण याय्वं बालेनयात थथे धाय्गु यानाहःगु खः । २०७७ सालय् येँ मपापाखें बजेट फ्यानाः तत्कालीन मेयर विद्यासुन्दर शाक्यपाखें शिलान्यास जुयाः निरन्तर निर्माण जुयाच्वंगु नेपालभाषा मंकाः खलःया भवन आः वयाः मेयर बालेनं दय्काब्यूगु धकाः प्रचार प्रसार सुरु जुइवं थुकीयात कयाः मेयर बालेनया भ्रामक प्रचार धकाः आलोचना सुरु जूगु खः ।
दबू छेँ नां बियातःगु मंकाः खलःया उगु छेँ पूर्व मेयर विद्यासुन्दर शाक्यपाखें बजेट निकासा यानाः दय्केज्या न्ह्याःगु खः । उगु छेँया शिलान्यास तकं पूर्व मेयर शाक्यं हे यानादीगु खः । थुकियात सुनां दय्कूगु धइगु खँय् आः सामाजिक संजालय् बहस हे जुयाच्वंगु दु । गुलिसिनं वर्तमान मेयर बालेनं निरन्तरता ब्युसेंलि बालेनं दय्कूगु धयां छु पात धकाः नं धयाच्वंगु दुसा गुलिसिनं विद्यासुन्दर शाक्यं बजेट फ्यानाः दय्केब्यूगु भवनय् बालेनं थःगु नां तयाः लबः नय्त स्वल नं धयाच्वंगु दु । गुलिसिनं धाःसा निम्हेसिनं दय्कूगु मखसें जनतां करया रुपं येँ महानगरपालिकायात पूगु धेबां दय्कूगुलिं उकिया जस निम्हं मेयरयात बी मज्यूगु, जनतां हे दयकूगु धइगु खँ नं तयाच्वंगु दु । न्ह्यागु धाःसां आः भवन निर्माण जुयाच्वंगु जग्गा व्यक्तिया नामं मंकाः खलःया नामय् हय्त नं २०७७ सालय् नेपाल सरकारं ४० लख तका ग्वहालि याःगु खःसा वयां लिपा तत्कालीन मेयर विद्यासुन्दर शाक्यं ५ करोड बजेट फ्याय्धुंकाः थुगु दबूछेँया दय्केज्या न्ह्याःगु खः व उकिया नितिं शाक्यं शिलान्यास नं यानादीगु खः ।
तर छु दिं न्ह्यः ‘हरपल’ नांया छगू अनलाइन मिडियां उगु भवन पूवंक हे बालेनं दय्काब्यूगु व उगु भवन दय्काब्यूगुलिं मुक्कं नेवाः समुदाय हे बालेन खनाः लय्तायाच्वंगु धइगु कथं सामग्री सम्प्रेषण यात । उगु भिडियो सामग्रीइ हरपल अनलाइनं मंकाः खलःया छेँय् दुने हे वनाः भिडियो नं शुटिङ यानातःगु दु । मेयर बालेन निर्वाचित जुयावय्धुंकाः याःगु ज्या जक वय्कःया नामय् क्यंसा गाःगुलिइ वय्कः वय् स्वयां न्ह्यः दय्कूगु दक्वं वय्कलं हे दय्कूगु धकाः भ्रामक प्रचार यानाः जनतायात भ्रमय् लाकेत स्वःगु धासें आः व्यापक आलोचना जुयाच्वंगु दु ।
हरपल जक मखु, थुकथं न्हापा हे जूगु ज्यायात आः वयाः बालेनं याःगु धकाः मेमेगु माध्यमपाखें नं प्रचार जुयाच्वंगु दु । थुकी विशेष यानाः युट्युब च्यानल दकले न्ह्यःने लाः । येँ महानगरया कार्यक्षेत्रय् मलाःगु मुख्य सडक दय्कूसां मेयर बालेनं याःगु धकाः प्रचार याय्गु, नेपाल विद्युत प्राधिकरणं यानाच्वंगु केबलयात भूमिगत याय्गु ज्याय् नं बालेनया हे नां स्वाय्गु यानाच्वंगु खनेदु । उकिया नापं पुर्व मेयर विद्यासुन्दर शाक्यं खरीद यानाथकूगु दमकल नं बालेनं हःगु, तत्कालीन मेयर विद्यासुन्दर शाक्यया पालय् १६५गः सिसिटिभि क्यामेरा जडान जुइधुंकूगु खःसां बालेन वय्धुंकाः तिनि सिसिटिभि क्यामेरा तःगु थें प्रचार याय्गु, १०२ या एम्बुलेन्स सेवा लकडाउनया इलय् हे न्ह्याकेधुंकूगु खःसां आः वयाः जक न्ह्याःगु थें प्रचार याय्गु ज्या नं जूगु दु । फायर हाइड्रेन्ट जडान नं न्हापा हे जुयाच्वंगु ज्या अले ब्रुमर नं न्हापा हे हयातय्धुंकूगु खःसां उकिया जस नं बालेनयात हे बीगु ज्या जूगु दु । कमलादीइ नीजि कम्पनीं दय्कूगु ग्लासया टावर नं बालेनं दय्कूगु धकाः नं आः प्रचार जुयाच्वंगु दु ।
थुकथं थीथी युट्युब च्यानल, फेसबुक पेज व अनलाइन पोर्टलं मेपिनिगु ज्या अले न्हापा हे जुयाच्वंगु ज्या बालेनं याःगु धकाः क्यनेगु धयागु बालेनप्रति समर्थन, जानकारी मदयाः धाःगु आदि मखसें बालेनपाखें हे निर्देशित धइगु द्वपं नं बियाच्वंगु दु । बालेनं थम्हं छुं मयाःसे मेपिनिगु ज्याया जस काय्गु नियतवश हे आर्थिक लाभ बियाः अनलाईन माध्यमतय्त थज्याःगु ज्या याकाच्वंगु द्वपं नं सर्वसाधारणं आः बालेनयात बियाहःगु दु ।
