कोशी प्रदेशया मुख्यमन्त्री उद्धव थापां थौं आइतवाः मन्त्रिपरिषद् विस्तार याउगुलि नेकपा माओवादी केन्द्रपाखे जीवन आचार्ययात आर्थिक मामिला लिसे योजना मन्त्रालययया जिम्मेवारी बिःगु दु।

आचार्य थ्व स्वया न्ह्यःया सरकारं पर्यटन, वन लिसे वातावरण मन्त्री बिःगु खः। एमाले नेता हिक्मतकुमार कार्की नेतृत्वया न्हापागु सरकारय् माओवादीं वंगु जेष्ठ २३ गते समर्थन लित काःगु खःसा आचार्यं थःगु पदपाखे राजीनामा बिःगु खः।

नेपाली कांग्रेसया नेता थापां मुख्यमन्त्री नियुक्त जुगु स्वन्हु लिपा हे आचार्ययात शक्तिशाली मन्त्रालयय् जिम्मेवारी बिःगु खः। प्रधानमन्त्री पुष्पकमल दाहाल प्रचण्डया जिलाजं खः जीवन आचार्य । उदयपुर–२ (१) पाखे निर्वाचित सांसद नारायण बुर्जा मगरं आः राजीनामा बिइगु चेतावनी बिःगु दु।

मगर म्हिगः शनिवाः तक आचार्य नाप मगरया न नां मन्त्री जुइगु धलखय् दुगु खः। आइतवाः मन्त्रिपरिषद् विस्तार जूगुलि मगरया नां लिकया माओवादीपाखे संखुवासभाया राजेन्द्र कार्की व जीवन आचार्यं शपथ काःगु खः। जीवन नाप शपथ काःगुलि राजेन्द्रनापं कांग्रेसं निम्ह व नेकपा एकीकृत समाजवादीं छम्ह मन्त्री बिना विभागीय जूगु दु।

Categorized in राजनीति