मिसा फुटबलं क्यंगु आस
प्रजित शाक्य | अनलाथ्व एकादशी ११४३, सावन १३ शनिवाः
अस्ट्रेलिया व न्युजिल्यान्ड्य् मिसा वल्र्ड कप जुयाच्वंगु दु । वल्र्ड कपय् हलिंया बल्लाःगु ३२ पुचः म्हिताच्वंगु दु । वल्र्डकप फुटबलय् नेपालं म्हितीगु असम्भव ताः । अथेखःसां मिसा वल्र्ड कप फुटबलय् नेपाःया ब्वति यथार्थपरक खनेदु । थ्व हचुवाकथं धयागु मखु । नेपालं मिसा वल्र्ड कप म्हितेफु धइगु छुं हुनित दु ।
मिसा वल्र्डकपय् एसियाया निगू देय् भियतनाम व फिलिपन्स नं दु । थुपिं निगुलिं देय्यात नेपालं टक्कर ब्यूगु यक्व मदुनि । न्याला न्ह्यः नेपालं भियतनामलिसे मिसा ओलम्पिक फुटबल एसियन क्वालिफायरय् निगू कासा म्हितल । भियतनामनापया निगुलिं कासाय् नेपाल बुत । अथेखःसां भियतनामनाप नेपाःया मिसा फुटबलरतय्सं नुग त्याकेगु कासा क्यन । निगू कासाय् हे नेपालं भियतनामयात कडा टक्कर ब्यूगु खः ।
२२ ला न्ह्यः उज्बेकिस्तानय् जूगु एएफसी मिसा एसियन कप २०२२ क्वालिफायरय् ला फिलिपिन्सयात नेपालं बुके हे त्यंगु खः । कासाया लिपांगु ईतक नं १–० गोलं न्ह्यःने लाःगु नेपाल कासा सिधय्त्यय्काः निगू गोल नयाः निराश जुल । अझ व कासाय् घाःपाः जूगु हुनिं नेपालया प्रमुख स्ट्राइकर सावित्रा भण्डारी साम्बाया उपस्थिति मखुगु खः । अय्जुयाः बांलाःक सुसाःकुसाः दःसा नेपालं मिसा विश्वकप फुटबल म्हितेफइ धकाः धाय्फइ ।
न्हापा नेपालया आज्जु दक्षिण एसिया खः । तर आः नेपालया मिसा फुटबल टिम दक्षिण एसियां थहांवय्गु ई जुइधुंकूगु दु । दछि नं मदुनि, नेपालं भारतयात खुक्वःगु साफ मिसा च्याम्पियन्सीपय् बुकाः फाइनल दुहांवंगु । गुगु कासां दक्षिण एसियाली मिसा फुटबलय् भारतया वर्चश्व क्वचाःगु खः । भारत थ्वयां न्ह्यःया न्यागुलिं संस्करणया च्याम्पियन खः । नेपाल धाःसा न्याक्वःमध्ये प्यक्वः फाइनलय् भारतलिसे बूगु खः । खय्तला नेपालं साफया खुक्वःगु संस्करणय् नं उपाधि त्याकेमफुत । नेपाल फाइनलय् बङ्गलादेशलिसे स्तब्ध जुल । गुगु नेपालया मिसा फुटबल टिमं बङ्गलादेशलिसे आःतक बूगु छगू हे जक कासा खः । तर थ्व वालय् बङ्गलादेशयात वयागु हे भूमिइ जूगु
निगू कासाया अन्तर्राष्ट्रिय मैत्री शृङ्खलाय् बुकाः नेपालं व हारया ब्वला सालेधुंकूगु दु ।
नेपालं दक्षिण एसियाया राष्ट्र जक मखु, कुवेत, इरान, काजखस्तानयात नं अःपुक हे बुकेधुंकल । नेपालया मिसा फुटबल टिम ओलम्पिक ल्यज्याया निगूगु चरणय् थ्यनुेधुंकूगु दु । आः फुटबल विश्लेषकतय्सं मिजं फुटबल टिमं स्वयां मिसा फुटबल टिमं नेपालयात यक्व अन्तर्राष्ट्रिय सफलता बीगु खँ ल्हानाच्वंगु दु । नेपाली मिसा फुटबल टिमया प्रशिक्षक अनन्तराज थापाया धापू न्यनेगु खःसा थ्व टिम नेपाली मिसा फुटबलया गोल्डेन जेनरेसन खः । बांलाक एक्सपोजर बियाः सुसाःकुसाः याय्फःसा थ्व पुस्तां नेपाली मिसा फुटबलयात तःगू हे उपलब्धि बी ।
नेपाली मिसा फुटबलया प्रगति जूगुलिइ नेपाल आर्मी, नेपाल पुलिस व एपीएफ थुज्वःगु विभागीय टिमयात श्रेय बीमाः । आर्मी, पुलिस व एपएिफं मिसा फुटबलरयात १२लाय् हे अभ्यासय् तयाः उमिगु स्तर थकाःगु दु । आः नेपालया थ्व स्वंगू फुटबल टिम दथुइ तःधंगु धेंधें बल्लाः जुइगु यँः । लिपांगु मिसा फुटबल लिगय् एपीएफ च्याम्पियन जुल । आर्मी क्लब ल्यू व पुसिल क्लब लियांल्यू लात । थुगुसी नगरपालिकाया टिम नं स्तरीय खनेदत । नगरपालिकाया टिमं विदेशी कासामि नं म्हितकूगु खःसा नेपाली मिसा फुटबलय् विदेशी कासामिं म्हितूगु न्हापांगु खुसी खः ।
आः नेपाली फुटबलया सर्वोच्च संस्था एन्फां नं मिसा फुटबलयात विशेष प्राथमिकताय् तःगु दु धाइ । एन्फा नायः पंकज नेम्वाङं नेपालया मिसा फुटबलया बांलाःगु भविष्य खंगुलिं याकनं हे मिसा फुटबलया लागिं मिसन विश्वकप २०२७–३१ प्रोजेक्ट न्ह्याकेगु धयादीगु दु । नायः नेम्वाङं धाःथें मिसा फुटबल विशेष प्राथमिकताय् लाःसा नेपाली मिसा फुटबलया विश्वकप म्हितेगु आज्जु पूमवनी धाय्फइमखु ।
नेपाल मिसा फुटबलयात अझ बांलाकेत घरेलु संरचना अझ बल्लाय्माः । एन्फां लिपांगु खुसी राष्ट्रिय लिग हे दथुइ क्वचाय्कूगु दृष्टान्त नं झीके मदुगु मखु । मिसा फुटबल टिमयात दक्षिण एसियां पिनेया बल्लाःगु टिमलिसे लगातार म्हितकेगु लकस तयार याय्माः । थ्बाहेक कासामितय्त नं विदेशी लिगय् म्हितकेत पहल याय्माः । नेपाली मिसा फुटबलर दक्षिण एसियाया मिसा लिगय् मज्जां चुइ ।
थुगुसीया भारतीय मिसा लिगय् नेपालया खुम्ह कासामि सावित्रा, रेखा पौडेल, सरु लिम्बु, रेणुका नगरकोटी, अनिता केसी, एन्जिला सुब्बा तुम्बहापें म्हितूगु खः । सावित्रां ला झिगू कासाय् २९ गोल यानाः तहल्का हे हल । लिच्वः कथं वय्कः युरोपेली क्लबया मिखाय् नं लात । थौंकन्हय् जक हे नेपालया स्ट्राइकर सावित्रा इजरायलया क्लब होपाइल रानानाय् अनुबन्धित जूगु दु । वय्कलं आः युरोपेली फुटबलया सवाः काइ । अज्याःगु हे ह्वःताः मेपिं मिसा कासामियात चूलाःसा नेपाली मिसा टिमया कायापलटन जुइगुलिइ शंकाः याय्म्वाः । खय्तला नेपाली फुटबलरया हकय् मिजं स्वयां मिसा कासामि हे विदेशी लिगय् चुइगु सम्भावना अप्वः । तर थुकिया लागिं थुपिं कासामिं लगातार म्हितेदय्माल । अले जक थुपिं कासामि विदेशी क्लबया मिखाय् लाइ ।
