देयन्यकं च्वपि मानन्धरपिनिगु मंकाः संस्था केन्द्रीय मानन्धर संघं तजिकं मंकाः कथं धाः बाजं ब्बज्या याःगु दु।

येँ महानगरपालिकानाप सहकार्य याना संघं १२ गु त्वाःया थीथी खलः, पुचः व गुठीपिन्स ब्बति काःगु खः। स्वनिगः नापं काभ्रे जिल्लाये न उगु ब्बज्याय् ब्बति काःगु खः।

येँपाखे लाय्कूसाः मानन्धर समाज, भिंद्यः गुथि कालिमाटी, चस्वांद्व मानन्धर सनाःगू खलः, थँहिटी मानन्धर गुथि, दैसाः टोल मानन्धर समाज, न्यागःमणि फेदी मानन्धर संघ, मानन्धर सनाःगू खलः न्हूसाः, पाक्व पुखूद्यां सनाः खलः, किपूया श्रीपञ्चमी मानन्धर गुथि, चन्द्रागिरीया मच्छेगाँ मानन्धर गुथि, फयख्वाः मानन्धर गुथि रामकोट व जापाली (वाँख्यो दाफा भजन खलः) काभ्रेया मानन्धरपिनिगु मौलिक बाजं ब्बज्या याःगु खः।

ज्याझ्वलय् न्ववानादीसे वाग्मती प्रदेश सांसद नापं पूर्वमन्त्री माननीय बसन्त मानन्धरं पुर्खापिन्स लल्हाना थकूगु मौलिक बाजं संस्कृतियात संरक्षण यायेगु ज्याय् फुगु ग्वाहलि यायेगु धका धयादीगु खः। अथेहे, येँ महानगरपालिकाया प्रवक्ता नवीन मानन्धरं देय् हे तिसाः कथं कयातःगु अमूर्त सम्पदा संरक्षण, प्रवद्र्धन व विकासया लागि स्थानिय सरकारं ज्या याना च्वनागु दु धका धयादीगु खः। वयकलं संस्कृतियात अर्थ व्यवस्थानाप न स्वाना यकल धाःसा आर्थिक उपार्जनया माध्यमपाखे न्ह्याके यकेफत धाःसा जक थज्यागु गतिविधिया औचित्य पुष्टि जुइ धका धयादीगु खः।

वीरगञ्ज पर्सौनीयात प्रतिनिधित्व यासे केन्द्रीय मानन्धर संघया सभापति मनोज कुमार मानन्धरया सभाध्यक्षताय् जुगु उगु ज्याझ्वलय् प्रतिनिधिसभाया सांसद माननीय सपना राजभण्डारी जोशी, वाग्मती प्रदेशका सांसद माननीय बसन्त मानन्धर, शैलेन्द्र बज्राचार्य, येँ महानगरपालिका वडा नं. १७ का वडाध्यक्ष नाप महानगरका प्रवक्ता नवीन मानन्धर, १३ का ध्रुवनारायण मानन्धर, २० या राजेन्द्र मानन्धर, श्री शार्दूल जंग गुल्मपति नेपाली सेनाया मेजर पूर्ण प्रजापति, सम्पदा विभाग उपप्रमुख श्रीजु प्रधान, नेवाः पत्रकार राष्ट्रिय दबूया नायः नृपेन्द्रलाल श्रेष्ठ नापं झिनिगु हे त्वाःया कजि लिसे बाजं गुरुपिनिगु ब्बति दुगु खः।

उगु ज्याझ्वः केन्द्रीय मानन्धर संघया सञ्चार उपसमिति व युवा उपसमितिं संयोजन याःगु खः।

Categorized in राष्ट्रिय