यापु समाज यलया युवा लिसे खेलकुद उपसमितिया ग्वसालय् जूगु काजिलाल अवाले स्मृति न्हापागु ब्याडमिन्टन कासाय् त्याःपिन्त म्हिगः छगु ज्याझ्वः दथुइ सिरपाः लःल्हाग्गु दु।

मेन्स डबल, भेन्ट्रान व अण्डर १७ याना स्वंगू पुचलय् जूगु कासाय् त्याःपिन्त बागमती प्रदेश उद्योग, वाणिज्य, भूमि लिसे प्रशासनमन्त्री रामकृष्ण चित्रकारया मूपाहाँ कथं झायादीगु उगु ज्याझ्वलय्यल महानगरपालिकाया उपप्रमुख मञ्जली शाक्य बज्राचार्य विशेष पाहाँ कथं झायादीगु खः।

वंगु भाद्र २० गतेनिसे न्ह्यागू उगु कासाय् यल महानगरया ४० गू त्वाःपाखे ब्बति काःगु खः। कासाय् अण्डर १७ समूहया हःखा छुसिकाया सौर्य महर्जन न्हाप, नागबहाःया सुगत शाक्य ल्यु, सप्तखेलया श्रीष प्रधान व नागबहाःया सम्यक शाक्य लियाल्यु लाःगु खः। अथेहे भेट्रान्सपाखे सुबहाःया राजाबाबु महर्जन व राजेन्द्र महर्जन न्हाप लाःगु खः।

अथेहे मंगःत्वाःया किशोर ब्यञ्जनकार व विरेन्द्रलाल श्रेष्ठपि ल्यु व लुखुसिया बिलन महर्जन व सन्जय महर्जनया जोडी व त्यागःया सञ्जय महर्जन व सानुबाबु महर्जनपिनिगु जोडी लियाल्यु लाःगु खः। अथेहे मेन्स डबलय् नागबहालया ससीन डंगोल व सुमन शाक्यया जोडीं ओकुबहाःया शान्त डंगोल व दिपेश शाक्ययात बूकां न्हाप जूगु खः।

फाइनल कासाय् नागबहालं ओकुबहाःयात २१–१३ व २१–१४ नं तःपिकं बूकुगु खः। मेन्स डबलय् पिन्छेबहाःया अमन महर्जन व दिपान महर्जन व दथुलँया राजु बज्राचार्य व सुमित महर्जनया जोडी लियाल्यु लागु खः ।

उगु पुरस्कार वितरण ज्याझ्वः युवा लिसे खेलकुद उपसमितिया संयोजक बाबुराजा महर्जनया सभाध्यक्षताय् जूगु उगु ज्याझ्वलय् ज्यापु समाज यलया अध्यक्ष तीर्थलाल महर्जन, निवर्तमान अध्यक्ष चन्द्र महर्जन, ललितपुर ९ वडाया अध्यक्ष लिसे प्रवक्ता राजु महर्जन, श्रम लिसे युवा समितिया प्रमुख नापं उपाध्यक्ष किरण महर्जनलगायतपिनिगु उपस्थिति दुगु खः।

Categorized in कासा