नीलबाराही माध्यमिक विद्यालयय् येँ महानगर १३ वडास्थित विद्यालयं लिकयाः वांछ्वयेधुंकूगु तख्ती अजिमाया ख्यलय् तयातःगु स्थानीय मनूतय् दिगुद्यः आः हानं पुलांगु हे थासय् स्वनेहःगु दु ।

दिगुद्यः थेंज्याःगु पुरातात्विक व धार्मिक महत्वया मूर्तित सिमन्टं ढलान यानाः धस्वाकूगु खँय् धाःसा स्थानीय सम्पदाह्यमितय्सं आलोचना याःगु दु । तख्ती अजिमाया ख्यलय् तयातःगु थ्व दिगुद्यःत स्कुलया स्वाहाने दयेके माल धकाः सुयातं छुं मधासे लिगनाः मेथाय् वांछ्वयातःगु खः ।

तर स्थानीय मनूतय्सं दिगुद्यः थेंज्याःगु सम्पदा अथे लिकयाः वांछ्वल धासें विद्यालयया विरोध यायेवं विद्यालयया स्वाहाने दयेकेगु ज्या दिउगु खः । वयां लिपा क्षमा पुजा यासें थ्व दिगुद्यः गन तयातःगु खः अन हे पलिस्था यायेगु धकाः खँ जूगु खः ।

स्कुलं दिगुद्यः लिकाःगु खँय् थःपिनि बदनाम जुइ धकाः हानं सुयातं छुं मधासे चांचां हे पुलांगु थासय् द्यः पलिस्था याःगु खः । तर द्यःत फुक्कं सिमेन्टं ढलान यानाः पलिस्था याःगु खँय् स्थानीय मनूतय्सं आलोचना याःगु दु ।

Categorized in राष्ट्रिय