निगुगु संस्करणया नेपाल सुपर लिग (एनएसएल) या लागि ललितपुर सिटी एफसीं फ्रान्सया गोलकिपर रेफ्री बाल्टुसयात अनुबन्ध याःगु दु।

ललितपुरं शनिवाः फ्रान्सया निगु, स्वंगू व प्यंगू डिभिजनया लिग फुटबल कासा म्हित्यः धुकुम्ह बाल्टुसयात अनुबन्ध याःगु खः। बाल्टुसं थःगु सामाजिक सञ्जालय् ललितपुर सिटीपाखे म्हित्यः खना थः तसकं उत्साहित जूगु धका च्वंगु दु।

लिपागु इलय् फ्रान्सया स्वंगू श्रेणीया क्लब एफसी राउनया लागि म्हितूम्ह ३१ दँया बाल्टुस आः फ्रि एजेन्टया कथं कायेगु याः। राष्ट्रिय टोलीइ डिफेण्डर अनन्त तामाङ मार्की कासामि दुगु ललितपुरं थ्व स्वया न्ह्यः निम्ह विदेशी कासामि अनुबन्ध याये धुकुगु दु।

नाइजेरियन डिफेण्डर ओमालाजा नुरेन करिम व फ्रेन्च फरवार्ड पापा इबो केबेयात थ्व स्वया न्ह्यः अनुबन्ध याये धुकुगु खः।

ओमालाजां नेपाःया फुटबलय् म्हसिगु नां खः। न्हापागु सिजनय् एनएसएल बुटवल लुम्बिनी एफसीपाखे म्हितूगु खःसा लिपागुलि मछिन्द्र एफसीपाखे शहीद स्मारक ए डिभिजन लिगय् म्हितूगु खः।

Categorized in कासा