२०८१ आषाढ ७, शुक्रबार

थ्री स्टार क्लबया अध्यक्षय् ज्ञान बहादुर शाक्य

लहनान्युज | कछलाथ्व अष्टमी ११४४, मंसीर ५ मंगलवाः

नेपाःया फुटबलय् प्रतिष्ठित क्लब थ्री स्टार क्लबया अध्यक्षय् ज्ञान बहादुर शाक्य निर्वाचित जूगु दु। क्लबया आइतवाः क्वचाःगु अधिवेशनं शाक्ययात अध्यक्षय् निर्विरोध निर्वाचित याःगु खः।

अथेहे क्लबया न्हुगु कार्यसमितिइ निर्मल रत्न शाक्य, विरेन्द्र लाल श्रेष्ठ, कृष्ण अवाले, जय कृष्ण श्रेष्ठ, रमेश अवाले व राम कृष्ण श्रेष्ठ उपाध्यक्षय् निर्वाचित जुगु दु सा महासचिवय् धर्मेन्द्र राज शाक्य व कोषाध्यक्षय् राम कृष्ण चित्रकार नियुक्त जूगु दु। सचिवय् कुल बहादुर महर्जन व निवास गोपाल बैद्य, सहकोषाध्यक्षय् देवेन्द्र लाल श्रेष्ठ व सदस्यय् प्रेमबहादुर चित्रकार, रामेश्वर अवाले, हरि महर्जन व मुकेश नकर्मी निर्वाचित जूगु खः।

यलया अशोक पार्टी प्यालेसय् जूगु उगु ज्याझ्वलय् क्लबया वार्षिक साधारण सभा यल महानगरपालिकाया मेयर चिरिबाबु महर्जन मूपाहाँ कथं झायादीगु खः। उगु ज्याझ्वलय् अखिल नेपाल फुटबल संघ(एन्फा)या अध्यक्ष पंकज बिक्रम नेम्वाङ, नेपाल ओलम्पिक कमिटी(एनओसी) या कार्यकारी निर्देशक लिसे उपाध्यक्ष चतुरानन्द राजबैद्य, महासचिव निलेन्द्र राज श्रेष्ठ, यल महानगरपालिकाया उपमेयर मञ्जली शाक्य बज्राचार्य, गोदावरी नगरपालिकाया प्रमुख गजेन्द्र महर्जनपिनिगु ब्बति दुगु खः।

नेपाल राष्ट्रिय लिसे अन्तर्राष्ट्रिय खेलाडी संघ (एनएनआइपी) या अध्यक्ष दिपक श्रेष्ठ, नेपाल ओलम्पियन संघया अध्यक्ष दिपक बिष्ट, नेपाल खेलकुद पत्रकार मञ्च (एनएसजेएफ) या अध्यक्ष देवेन्द्र सुवेदी व ललितपुर उद्योग वाणीज्य संघया अध्यक्ष बिश्वराज बज्राचार्य न उपस्थिति दुगु खः।

न्हुगु कार्यसमितिया न्हापांगु बैठकं बिधान कथं अतिश कृष्ण श्रेष्ठ व सञ्जीव शिल्पकारयात सल्लाहकार समितिया सदस्यय् नियुक्त यायेगु निर्णय याःगु खः।

Categorized in कासा