२०८० फाल्गुण १२, शनिबार

अस्ट्रेलिया क्रिकेटय् विश्व च्याम्पियन

प्रजित शाक्य | कछलागा दुतिया ११४४, मंसीर १३ बुधवाः

अस्ट्रेलियातय्सं न्ह्यावलय् न थःगु टिमं आइसीसीया मू कासाय् म्हितीइगु इलय् उपाधिया आशा यायेगु याइ । अस्ट्रेलियाली क्रिकेट टिम अप्पो याना थःगु समर्थक तय्गु भलसा कायेगु याइ । अस्ट्रेलिया विश्व क्रिकेटय् अप्पो ताःलागु टिम खः । थुगु पटक न अस्ट्रेलियां विश्वकपया उपाधि त्याकां थःपि विश्व क्रिकेटया जुजु खः धका सावित याःगु दु। अस्ट्रेलियां दकलय् अप्पो खुक्वःतक च्याम्पियन जुइ धुकुगु दु । थ्व स्वया न्ह्यः सन् १९८७, १९९९, २००३, २००७ व २०१५ य् न अस्ट्रेलिया विश्व विजेता जुइ धुकुगु दु ।
 
अस्ट्रेलियां घरेलु टिम भारतयात फाइनलय् खुगु विकेटं निराश यासे विश्वकप क्रिकेट कासाया १३ क्वःगु संस्करणया उपाधि त्याकूगु खः । भारतया अहमदाबाद नरेन्द्र मोदी क्रिकेट रङ्गशालाय् उपस्थित १ लाख ३२ हजार दर्शक व १ अर्ब ४० करोड भारतीय तय्त सुम्कंतया अस्ट्रेलिया च्याम्पियन जूगु खः । सन् २००३ य् अस्ट्रेलियां भारतयात हे उपाधि भिडन्तय् बूकां उपाधि त्याकूगु खः । भारतं थुगु पटक उपाधि त्याकां आकर्षक ट्रफीया नापं ४० लाख अमेरिकी डलर ल्हातय् लाकूगु खः । भारतं २० लाख अमेरिकी डलरय् चित्त बुझे यायेमाःगु खः ।
भारतया १२ दँ लिपा विश्व च्याम्पियन जुइगु म्हगसंयात चकनाचुर यानाबिःगु खः । थ्व स्वया न्ह्यः, सन् २०११ य् थःगु हे छेँय् विश्वकप जुगु इलय् भारत च्याम्पियन जूगगु खः। तर वया लिपा भारत विश्वकपय् न्ह्यावलय् निराश जक जुइमाःगु खः । थुगु पटक भारत मूकं झीगु कासाय् त्याकां फाइनलय् थ्यःगु खःसा लिपागु कासाय् अस्ट्रेलियायात बूके मफया च्याम्पियन जुइ मफुगु खः ।
 
थुगु पटक जुगु कासाय् भारतयात विश्वकप क्रिकेट कासाय् प्रमुख दावेदारया कथं कयातःगु खः । भारतया टिम बांलागु कथं कयातःगु खः । उकिइ भारतं थुगु पटक विश्वकप त्याकिइगु भलसा कयातःगु खः । भारतया क्रिकेट टिम फाइनल थ्यनेगु न्ह्यःतक दक्को कासा त्याना च्वंगु खः । उगु कासाय् दक्का् विपक्षी तय््त बूकां न्ह्यावना च्वंगु खः। उकिइ फाइनलय् भारतयात दावेदार कथं कयातःगु खः । तर भारतं फाइनलय् बामलाक्क हे अस्ट्रेलियानापं बुइमाःगु खः।
 
अस्ट्रेलियानाप टस बूया न्हापां ब्याटिङ याःगु भारतं २४० रनय् हे अलआउट जूगु खः । न्हापाम्ह ब्याट्सम्यान ट्भिस हेडं १३७ रनया शतकीय पालि म्हितीइवं अस्ट्रेलियां न्ह्यय्गू ओभर ल्यःदुगु इलय् प्यंगू विकेटया क्षतिइ २४१ रन दय्का लक्ष्य पूरा याःगु खः ।
 
भारतया विश्वकप थे जाःगु आइसिसीया प्रमुख कासाय् फाइनलय् आःतक बालागु लिच्वः वःगु मदु । सन् २०११ य् विश्वकप त्याके धूका भारत आइसिसीया प्यंगू मू कासाय् फाइनलय् बूगु दु । सन् २०१४ य् टि २० विश्वकप फाइनल, सन् २०१७ य् च्याम्पियन्सीप ट्रफी फाइनल, सन् २०२१ य् विश्व टेस्ट च्याम्पियन्सीपया फाइनल व थुगु पटक थःगु देशय् जूगु एकदिवसीय विश्वकपया फाइनलय् न बूगु खः।
 
फाइनलय् अस्ट्रेलियाया निम्ह कासामि हिरो जुगु इलय् ल्यःज्या जुगु हे न्हापां विवादय् लाःगु खः । भारतविरुद्ध म्याच त्याकेगुलि निम्ह ब्याट्सम्यान ट्रेभिस हेड व मानस लाबुस्चेकै ल्यःज्या जुगु इलय् हे विरोध जूगु खः । अस्ट्रेलियाली टिमं वंगु सेप्टेम्बरय् ल्हाः त्वःधूया बालाक्कं स्वस्थं मज्यूम्ह हेडयात घाः जुयाच्वंम्हेसित टिमय् दुथ्याकूगु खः। उकिइ हेडं न्हापांगु प्यंगू कासा म्हित्य मफुगु खः। तर हेडं पुनरागमनय् असाधारण ब्याटिङ यासे चयनकर्ता तय्सं भलसा याःगु पाय्छी खः धका सावित याना बिःगु खः । फाइनलय् न हेडं शतकीय पालिया इतिहास दयकूगु खः । हेड फाइनलय् जक मखु दक्षिण अफ्रिकाविरुद्धया सेमिफाइनलय् न म्यान अफ दि म्याच जूगु खः । हेडनापं शतकीय साझेदारी याःम्ह भारतयात फाइनलय् निराशयाःम्ह लाबुस्चे न सुरुया १८ म्ह सदस्यीय टिमय् दुमथ्याम्ह खः । लाबुस्चे न लिपा जक टिमय् दुथ्याकूगु खः । अस्ट्रेलियां विश्वकप त्याकिइगुलि उपि निम्ह हे मू कासामि जुगु खः ।
अस्ट्रेलियां विश्वकपय् न्हापां उलि बालागु सुरुवात याये मफुगु खः। न्हापांगु कासाय् भारत व निगु कासाय् दक्षिण अफ्रिकानापं बामलाक्कं बुइवं अस्ट्रेलिया थुगु पटक याकन हे छेँ लिहावनिइ धका तक अनुमान याःगु खः । अस्ट्रेलियां सुरुया निगु कासा लिपा संगठित जूया च्याम्पियन टिमया कथं म्हितूगु खः । अस्ट्रेलियां वया लिपा लगातार झीगु कासा त्याकां थः क्रिकेटया जुजु खः धका क्यंगू खः।
 
लिग चरणय् दक्षिण अफ्रिका, न्युजिल्यान्ड व अफगानिस्तान न खतरनाक टिमया कथं वःगु खः । विशेषत ब्याटिङय् चम्के जूगु दक्षिण अफ्रिका सेमिफाइनलय् अस्ट्रेलियाया धरापय् लागु खः । दक्षिण अफ्रिकायात मू कासाय् बालाक्कं म्हितूसा अभागी कथं काइगु टिम खः । थुगु पालिइ न दक्षिण अफ्रिकायात चोकर्सया दाग लागु पाय्छी खः धका सावित याःगु दु । न्युजिल्यान्ड न न्हापागु पटक विश्व च्याम्पियन जुइगु म्हगस पूरा मजुगु खः । लिपागु प्यदँय् न्युजिल्यान्ड तुयुइगु बलय् क्रिकेटया स्वक्वःतक फाइनलय् निराश जूगु खः । लिपागु विश्वकप एकदिवसीय क्रिकेटया फाइनलय् इङ्गल्यान्डनाप सुपर ओभरय् कम चौका थ्वागू आधारय् जक पराजित जूया न्युजिल्यान्ड विश्व विजेता जुइ मखंगु खः। थुगु पटक न मेमेगु टिमया तुलनाय् म्याच विनरया कमी जूसा न्युजिल्यान्डं टिमवर्कया कथं म्हितां सेमिफाइनलय् तक थःगु थाय् दयकूगु खः।
 
तुलनात्मकरुपं कमजोर कयातःगु अफगानिस्तानया लागि थुगु पटकया विश्वकप बालाक्क म्हितुगु दु । अफगानिस्तानं स्वंगु पूर्व च्याम्पियनपि इङ्गल्यान्ड, पाकिस्तान व श्रीलङ्कायात तक अज्जु चाइपुगु लिच्वः पिकागु खः । युद्धं थकित राष्ट्र अफगानिस्तान अस्ट्रेलियाविरुद्ध त्याय् त्यःगु खः । ग्लेन म्याक्सवेलं अविजित २०१ रनया दोहोरो शतकीय पालि म्हितीइगु वं जक अस्ट्रेलियां बल्लतल्ल उगु कासा त्याकां सेमिफाइनलय् थःगु थाय् सुरक्षित याःगु खः । म्याक्सवेलया दोहोरो शतक विश्व क्रिकेट इतिहासय् दकलय् बालागु पालि जुगु दु । म्याक्सवेलं अफगानिस्तानविरुद्ध रन दयकूगु खः ।
 
म्याक्सेवलं दोहारो शतकीय पालिं बुइगु स्थितिइ दुगु अस्ट्रेलियां अफगानिस्तानयात स्वंगू विकेटं बूकां सेमिफाइनलय् थःगु थाय् दयकूगु खः । उगु कासाय् अफगानिस्तानं बिःगु २९२ रनया लक्ष्य पूरा यायेगु झ्वलय् अस्ट्रेलियां ९१ रनय् न्ह्यय्गू विकेट वनेधुकुगु खः । तर वया लिपा म्याक्सवेलं चमत्कारीक पालि म्हितूगु खः ।
 
म्याक्सवेलयात ब्याटिङया इलय् स्वक्वःगु पटक मांशपेशीया समस्या वःगु खः । रन काय्गु झ्वलय् ब्बाय् वःगु इलय् तकंमछि दःगु खः । दथुइ दथुइ उपचार यायेमाःगु खः । फुटवर्क मदु ।
तर म्याक्सवेलं हिम्मत याःगु खः । घाःपाः जूसा झन् म्याक्सवेलं चौका व छक्का थ्वायेगु मत्वःतू व लिपांतक क्रिजय् टिके जूया याकचां म्हितां त्याकां त्वतलं ।
 
न्हापाम्ह विजेता इङ्गल्यान्डया कमजोर प्रदर्शनं सकसित अज्जु चाय्का बिःगु दु । इङ्गल्यान्डया टिमयात थुगु पटक तसकं बालागु टिम कथं कयातःगु खः । अय्न इङ्गल्यान्डया उपाधि रक्षा अभियानया सुरुइ न्ह्यगू कासाय् खुगु कासा बुइवं निरासा जुइ माःगु खः । श्रीलङ्काया प्रदर्शन न कमजोर जुल । अथेहे चर्चाय् दुगु पाकिस्तान न भारतया यक्को दबाब दथुइ बालाक्कं प्रदर्शन याये मफुत ।
 
कोहली सर्वश्रेष्ठ कासामि 
भारतया विराट कोहली विश्वकपया सर्वश्रेष्ठ कासामि जूगु दु । कोहलीं स्वंगु शतकनापं ११ गु कासाय् ७६५ रन दयकूगु खः । कोहली छगू विश्वकपय् दकलय् अप्पो रन दयकूम्ह ब्याट्सम्यान जूगु दु । कोहलीं सचिन तेन्दुलकरया कीर्तिमान भङ्ग याःगु दु । तेन्दुलकरं सन् २००३ य् दक्षिण अफ्रिकाय् जूगु कासाय् विश्वकपया ११ गु कासाय् ६७३ रन दयकूगु खः । भारतया तेज बलर मोहम्मद सामी दकलय् अप्पो विकेट काम्ह जुगु दु । सामीं न्ह्यगू कासाय् २४ विकेट काःगु खः ।