पशुपति क्षेत्र विकास कोषं बालाचःह्रेया दक्को तयारी पूरा जूगु दु धका धाःगु दु।

पशुपति द्यःया थाय् कन्ह्यः चान्ह्यःनिसे सुरु जुइगु बालां ह्वलेगु निति दक्को तयारी पूरा जुइ धुकुगु दु धका कोषया सदस्यसचिव राजुकुमार खत्रीं जानकारी बिःगु दु ।

वयकःया कथं कोषं बालाचःह्रे कुन्हु मत च्याकेगु निति ‘कोर’ क्षेत्र दुने शतबीज ह्वलेगु व्यवस्था मिले याःगु दु धका धाःगु दु। थःथीति मदुपिनिगु लुमन्तिइ चःछि मत च्याकेगु याइ व कन्ह्यः कुन्हु शतबीज ह्वलेगु जुगुलि उमिगु लागिु माःगु सुरक्षानिसे याउक ज्या क्वचायेकेत तक व्यवस्था कोषं मिले याःगु दु धका कार्यकारी निर्देशक डा घनश्याम खतिवडां धाःगु दु ।

अथेहे पशुपतिइ मङ्सिर २४ गते चान्ह्यः निसे बालाचतुर्दशी कुन्हु यः यः थे शतबीज मह्वलेत पशुपति क्षेत्र विकास कोषं इनाप याःगु खः। कोषं कैलाश चौरय् पाल तया मत च्याके मदइगु व तर शतबीज धाःसा ह्वले दइ धका धाःगु दु ।

मत च्याकेगु निति कैलाशया फेदी, पशुपति द्यःया जःखः, पशुपति कोरक्षेत्र, हंशमण्डप, चौरनापं खुसि सिथय् च्याकेगु व्यवस्था मिले याःगु दु धका धाःगु दु।

Categorized in राष्ट्रिय