नेप्से १५ दशमलव ४० अङ्कं कुहावलं
शोभा श्रेष्ठ | कछलागा चःह्रै ११४४, मंसीर २५ सोमवाः
म्हिगः आइतवाः थहावंना ’सर्किट’ लगे जुगु शेयर बजाः थौं सोमवाः हाकनं कुहावःगु दु।
न्हिच्छियकं थहाकुहावंगु शेयर बजाः परिसूचक नेप्से बन्द जुगु इलय् १५ दशमलव ४० अङ्कं कुहावया १ हजार ९ सय ४८ दशमलव ५७ विन्दुइ थ्यःगु खः। थौं निर्जीवन बीमा, माइक्रोफाइनान्स, उत्पादन तथा प्रशोधन व म्युचल फन्डबाहेक दक्को समूहया शेयर कुहावःगु दु।
विकास बैंक, जीवन बीमा, होटल तथा पर्यटन, व्यापार, फाइनान्स समूहया शेयर तसकं थहावःगु दु। अथेहे थौं दकलय् अप्पो समता घरेलु लघुवित्तया शेयर ७ प्रतिशत स्वया अप्पो कुहावःगु दु। समग्र बजाः कुहावःसां बोटलर्स नेपाल, सामुदायिक लघुवित्त व दोल्ती पावर कम्पनीया शेयर धाःसा १० प्रतिशतं थहावंगु दु। बजाः घटे जूसा कारोबार रकम धाःसा थहावंगु दु।
थौं १ करोड ८६ लाख कित्ता शेयर ४ अर्ब ८४ करोड रुपैयाँया कारोबार जूगु दु। थुगु कारोबार रकम न्याला लिपा हे दकलय् अप्पो जूगु दु। थ्व स्वया न्ह्यः असार १७ गते ५ अर्ब १ करोड रुपैयाँया शेयर कारोबार जूगु खः ।
उगु इलय् कारोबार रकम ५ अर्ब रुपैयाँ मथ्यंगु खः। दकलय् अप्पो सोनापुर मिनरल्स एन्ड आयल लिमिटेडया २५ करोड रुपैयाँया शेयर कारोवार जूगु खः।
Categorized in राष्ट्रिय