२०८१ जेठ ९, बुधबार

जः जुयाः लुयाच्वन सत्यनारायणयात !

सुरजवीर बज्राचार्य | थिंलाथ्व पुन्ही ११४४, पुस १० मंगलवाः

असत्यया राजनीतिइ सत्य गुबलेतक तनाच्वनी ? खिउँपाखें जः गुबलेतक कुंका च्वनेफइ ?  
 
असत्य सत्यया भावशान्त जूगु तायेका थः त्याःगु अभिमान यानाच्वनी। खिउँ सुथ जुइगु तथ्य ल्वःमंकाः थः हे संसार खः धइथें तायेकाच्वनी। तर इलं जः लुइ, सत्य झलमल्ल धायेका त्वयेवं असत्य व खिउँया अस्तित्व न्हनी । सकसिनं व सब्बु चा ल्वमंकी। 
नेपाल पत्रकार महासंघया संस्थापक अध्यक्ष सत्यनारायण बहादुर श्रेष्ठ खः। तर वय्कःया न्ह्यलुवाःकथं यानादीगु कर्मया मान मतःसे उगु ई व इतिहासयात हुइगु व ल्वमंकेगु कुतःयाविरुद्ध ब्वलंगु आन्दोलनं ‘छन्हु सुथ लुइ’ धइगु आत्मविश्वास ब्वलंकाच्वंगु दु, सत्यतथ्य मताःपं ह्वलाच्वंगु दु।
 
थुगु सलय् सः तनाः छगू अभियानकथं न्ह्याकेगु ज्या नेवाः पत्रकार राष्ट्रिय यात। थुगु अभियानय् छगू मेगु तँसा धइगु हनेबहःम्ह श्रेष्ठया जन्म जयन्ती हनेगु परम्पराया शुरुवात खः। 
 
ने.सं. ११४० स न्हापांगु खुसी १०४ क्वःगु जन्मजयन्ती हनेगु ज्याझ्वः यल मानभवनया आदर्श विद्या मन्दिर (एभिएम) स्कुलय् जूगु खः । वय्कः छम्ह शिक्षाविद्नापं  यलया एभिएम स्कुलया संस्थापक प्रधानाध्यापक नं खः वय्कः। उगु स्कुलय् वय्कःया झ्वाताः नं स्वनातःगु हुनिं उगु हे थासय् १०४ क्वःगु जन्म जयन्ती हनेज्या जूगु जुल। नेपाल आदिवासी जनजाति पत्रकार महासंघ, मधेसी पत्रकार फोरम व मेमेगु भाषाभाषी पत्रकारपिनिगु सहभागिताय् नेवाः पत्रकार राष्ट्रिय दबूपाखें न्ह्याकूगु थुगु परम्पराय् १०५ क्वःगु जन्म जयन्ती हनेज्या नं एभिएम स्कुलय् हे यानागु खःसा उगु ज्याझ्वलय् मूपाहांकथं सञ्चार तथा सूचनमा प्रविधि मन्त्री पार्वत गुरुङ मूपाहांकथं झायादीगु खः। वयकःयात थुगु गम्भीर विषय ध्वाथुइकेगु नितिं थुगु ज्याझ्वः अतिकं महत्वपूर्ण सिद्ध जुल ।
 
वयकलं थुगु विषय ध्यान बीगु प्रतिवद्धता नं प्वंकादीगु खः थुगु ज्याझ्वलय्। तर इलं झीत साथ मबिल, ज्या मन्ह्यात तर पत्रकार दबूया पलाः निरन्तर न्ह्यानाच्वन। थुगु पलाखय् मेगु आपालं ज्याझ्वः यायेग व ध्यानाकर्षणया नितिं थीथी थासय् सः तयेगु ज्या निरन्तर जुयाच्वन। थ्व हे झ्वलय् १०६ क्वःगु जन्म जयन्ती हनेज्या नेपाल पत्रकार महासंघया सभाहलय् जूगु जुल। थःगु हे भवनय् थः हे संस्थापक अध्यक्ष सत्यनारायण बहादुर श्रेष्ठया १०६ क्वःगु जन्म जयन्ती हनेगु ज्या जुलं नं पत्रकार महासंघया नायः, पदाधिकारी, दुजःपिं सुयागु नं उपस्थिति मजुल।
 
ज्याझ्वः यायेत माक्वः ग्वाहालि धाःसा यानादिल। थुगु ज्याझ्वलय् पत्रकार महासंघया ब्यवहारं सत्यनारायण बहादुर श्रेष्ठया योगदान नकारे यायेगु क्षमता नं पत्रकार महासंघयाके मदुगु सीदतसा स्वीकार यायेगु आत्मविश्वास मदु धइगु नं सीदत। धात्थें गजाःगु प्रभावं थाय् कयातःगु जुइ, थुगु गलत तथ्यं गजाःगु हा कयातःगु जुइ, पत्रकार महासंघया ज्यासना पुचः सहभागी जुइत तक मछिं तायेकीगु ! थुगु ज्याझ्वलं पत्रकार दबू लगायत आदिवासी जनजाति पत्रकार महासंघ, मधेसी पत्रकार समाज व मेमेगु संघसंगठनया पलाः अझ धिसि धायेमाःगु चेतना ब्वलंकल । 
 
थुगु अभियानया धिसिधाःगु संघसंस्था, ब्यक्तित्वपिं मुनाः १०७ क्वःगु सत्यनारायण बहादुर श्रेष्ठ जन्मजयन्ती हना ज्याझ्वः यलया ज्वागल बैंक्वैटय् जूगु जुल । 

नेपालय् पत्रकारतय्त संगठित यायेगु तातुनां दकले न्हापां २००८ सालय् नेपाल टुडेया सम्पादक सत्यनारायण बहादुर श्रेष्ठं नेपाल पत्रकार संघ स्वनादिल । गुगु कार्यसमितिइ सेक्रेटरी भोजबहादुर सिँह न्यौपाने दुगु उल्लेख ग्रीष्मबहादुर देवकोटां ‘नेपालको छापाखाना र पत्र–पत्रिकाको इतिहास’ सफुतिइ यानादीगु दु ।  पत्रकारिताया दक्वं ब्वतिपिन्सं ब्वंगु तथ्य खः थ्व । अनंलि २००९ साल वैशाख २८ गते आर्य समाज मन्दिर, भोताहितिइ जूगु संघया निक्वःगु सभां हाकनं नेपाल टुडेया सम्पादक सत्यनारायणबहादुर श्रेष्ठयात हे सभापति ल्यःगु खः । 
 
कार्यसमितिइ उपसभापति प्रेमराज शर्मा (सं, गोरखापत्र), सेक्रेटरी भोजबहादुर सिँह न्यौपाने, (सं, तरंग), ज्वाइन्ट सेक्रेटरी रामहरि जोशी, (सं, नेपाल पुकार), कोषाध्यक्ष रामराज शर्मा, (नेपाल पुकार) व सदस्य नारायणप्रसाद उपाध्याय, देवेन्द्रराज शर्मा, भीमभक्त जोशी, प्रकाशचन्द्र टण्डन दुगु खः। थुगु सघं उबले देय् दुने व पिने च्वंपिं पत्रकारपिनिगु स्वापू दयेकाः श्रमजीवी पत्रकार व समाचारपत्रया अधिकार रक्षा यायेगु तातुनां न्ह्यांवंगु खःसा संचार ख्यलय् दुगु अस्पष्टता व तत्कालिन सरकारं संचार ख्यलय् हस्तक्षेप यायेफुगु कानूनया खँय् सः थंगु खः।
 
ग्रीष्मबहादुर देवकोटाया सफू पुस्तक “नेपालको छापाखाना र पत्रपत्रिकाया इतिहास” य् १२ पाना नेपाल पत्रकार महासंघ गठनया खँय् च्वयातःगु दु । सफुतिइ प्रष्ट च्वयातःगु दु कि नेपाल पत्रकार संघया स्थापना २००८ सालय् जूगु खः । थुकिया संस्थापक अध्यक्ष सत्यनारायण बहादुर श्रेष्ठ खः । गोरखापत्रय् २००९ सालय् प्रकाशित पत्रकार संघया ज्याखँया समाचारं नं २००८ सालय् सत्यनारायण बहादुर श्रेष्ठं संस्थापक अध्यक्ष जुयाः न्ह्यज्याकूगु संगठनया विषयय् थु तथ्यं पुष्टि यानाब्यू ।   
 
२००८ सालय् पत्रकार छवाः यायेगु नितिं सत्यनारायण बहादुर श्रेष्ठं न्ह्याकादीगु पलाः अथे धायेबलय् नेपाल पत्रकार संघ स्थापना याःगु सर्वस्वीकार्य तथ्य खः । अथेखःसां नं  थ्व तथ्य पत्रकार महासंघं नालाकाःगु खनेमदु । थुलि जक मखु, थुगु इतिहास हुइगु कुतः नं जुयाच्वंगु दु।
 
थुगु इतिहास हुयाः स्थापित यायेगु कुतः जुयाच्वंगु धइगु २०१२ साल ज्याखँ खः । थुगु तथ्यय् राजनैतिक प्रभाव खनेदु । नेपाली काँग्रेसया संस्थापक नेता व पूर्व प्रधानमन्त्री कृष्णप्रसाद भट्टराईयात संस्थापक अध्यक्षकथं ब्वयेगु ज्या याःगु दु ।  वय्कःया हे नामय् संस्थापक अध्यक्ष धकाः आमसंचार प्रतिष्ठान गठनया उद्घोष व  कुतः जूगु दु । थुगु निन्दनीय ज्या हे सत्यनारायण बहादुर श्रेष्ठया इतिहास हुइके मबीगु जक मखु अझ धिसिधाक्क सः थ्वयेकेगु नितिं नं शक्ति जुयाबिल । 
 
नेवाः पत्रकार राष्ट्रिय दबुलिं थःगु प्रत्येक ज्याझ्वलय् न्हापांम्ह मातृभाषा पत्रकार धर्मादित्य धर्माचार्यया किपानाप सत्यनारायण बहादुर श्रेष्ठया किपा ब्वयाः स्वां देछायेगु यानाः वयाच्वंगु जुलसा नेपाल आदिवासी जनजाति पत्रकार महासंघं नं थःगु प्रत्येक ज्याझ्वलय् सत्यनारायण बहादुर श्रेष्ठया किपातय् स्वांमाः क्वखायेकाः ज्याझ्वः न्ह्याकेगु व वयकःया योगदानया चर्चा यायेगु निर्णय यात । महासंघया हे ग्वसालय् जूगु छगू ज्याझ्वलय् पत्रकार महासंघनापं थीथी राजनैतिक दलया सत्तीगु पत्रकार खलः, पुचःतय्त न्यंकेमाःगु सकलें न्यंकेगु ह्वःता नं चूलात । थुगु विषय पत्रकार महासंघ गम्भीर जुयाः ज्या यायेगु धइगु प्रतिवद्धता वल तर गुलि विश्वास यायेफइ इलं क्यनी जुइ । 
 
विश्वास व अविश्यासय् ततमक्यंसें थःगु अभियान निरन्तर यानाच्वंगु पत्रकार दबुलिं थुगुसी नेपाल पत्रकार महासंघया संस्थापक अध्यक्ष सत्यनारायण बहादुर श्रेष्ठया १०८ क्वःगु जन्म जयन्ती हनेज्याया झ्वलय् थीथी ज्याझ्वःया घोषणा जूगु दु । रक्तदानं, सांस्कृतिकलिसें फुटसल कासातकया ज्याझ्वलं थुगु सलय् सः तनी, थुगु सः अझ तःसः याइ धइगु भलसा अवश्य नं दुगु हे जुल । 
 
अवश्य नं संचार ख्यलं समाज सः बुलन्द याइ । विकृति न्हंकेत तिबः बी । न्यायया नितिं च्वसा न्ह्याकी । देय्या ह्यूपालय् उलि महत्वंजाःगु कर्म याःम्ह पत्रकारिता ख्यःया न्ह्यलुवाः, नेपाल पत्रकार महासंघया संस्थापक नायःया पहिचानय् हे अन्यास जुयाच्वंगु झीसं गुकथं स्वयाच्वने फइ ? न्ह्यसः थुगु हे खः । थुगु इतिहास हुइगु कुतःया विरुद्ध संघर्ष सम्बोधन मजूतले निरन्तर न्ह्यानाच्वनी । संस्थापक अध्यक्ष श्रेष्ठया १०८ क्वःगु जन्मजयन्तीया लसताय् न्यायया निभाः अवश्य नं त्वइ धइगु आत्मविश्वासलिसें भिंतुनागु जुल।