प्रधानमन्त्री पुष्पकमल दाहालं स्वास्थ्य बिमा ज्याझ्वःयात राष्ट्रिय गौरवया अभियान कथं घोषणा यायेगु गृहकार्य जुयाच्वंगु दु धका धयादीगु दु।

थौ मंगलवाः प्रतिनिधिसभाय् सांसदतय्गु न्ह्यसःया लिसः बिइगु झ्वलय् प्रधानमन्त्री दाहालं स्वास्थ्य बिमा परिचयपत्र अनिवार्य यायेगु, वैदेशिक रोजगारीइ वनिइपिनिगु परिवारय् अनिवार्य बिमा, आम्दानी कथं प्रिमियमया आधारय् दक्को कर्मचारी, शिक्षक, जनप्रतिनिधिपिन्त अनिवार्य बिमा यायेगु ज्याझ्वः याकन हे न्ह्यायेत्यःगु दु धका धयादीगु दु।

दक्को प्रकारया स्वास्थ्य सुरक्षाया ज्याझ्वःयात स्वास्थ्य बिमापाखे एकीकृत यायेगु व स्वास्थ्य बिमायात राष्ट्रिय गौरवया अभियान कथं घोषणा यायेगु विषय सरकारं गृहकार्य यानाच्वनागु दु धका प्रधानमन्त्री दाहालं धयादीगु खः।

प्रधानमन्त्री दाहालं आःतक ३३ दशमलव २ प्रतिशत छेँ जःपि व २४ दशमलव ७ प्रतिशत जनसङ्ख्या स्वास्थ्य बिमाया दायराय् वःगु व ७५१ पालिकातक स्वास्थ्य बिमायापि दय धुकुगु दु धका धयादीगु खः।

Categorized in राष्ट्रिय