नेवाः पत्रकार राष्ट्रिय दबुलिं छगु ज्याझ्वः दथुइ खुम्ह मिसा पत्रकार तय्त साधना पत्रकारिता सम्मान याःगु दु।

अन्तराट्रिय श्रमिक महिला दिवसया लसताय् जुगु उगु ज्याझ्वलय् उपप्रधान लिसें स्वास्थ्य तथा जनसंख्या मन्त्री उपेन्द्र यादव मूपाहाँ कथं झायादीगु खः। गोरखापत्र न्हिपौया यलु जोशी, नेपाल समाचारपत्रया भगवती तिमल्सिना, नेपाल टेलिभिजनया पवन वर्षा शाह, मेट्रो एफ एमया रिता महर्जन, नयाँ पत्रिकाया शान्ति तामाङ व स्वतन्त्र फोटो पत्रकार सुनी बनेपालीयात नेपाल आदिवासी जनजाती पत्रकार महासंघया न्वकू अमरध्वज लामां खादा, पत्रकार दबूया नायः नृपेन्द्रलाल श्रेष्ठं स्वामा व मूपाहाँ उपप्रधान लिसें स्वास्थ्य तथा जनसंख्या मन्त्री उपेन्द्र यादवं हनापौ लःल्हानादीगु खः।

मूपाहा उपप्रधानमन्त्री यादवं देशय् संघीयता वःसा न जातीय भेदभाव अझ न ल्य दयाच्वंगु दु धका धयादीसे परिवार, समाजयात बांलाःगु लँय् न्ह्याःवनेगु शिक्षा मिसां हे बीफइगु जूगुलिं समाजया विकास यायेत मिसातय् हे विकास जुइमाःगु धका धयादीगु खः । पत्रकार राष्ट्रिय दबुलिं ११४ क्वःगु महिला दिवसया लसताय् क्रियाशिल महिला पत्रकारतयत साधना मिसा पत्रकारिता सम्मान ज्याझ्वः याःगु खः ।

नेपाल न्हापां महिला लय्पौ प्रकाशक व सम्पादक जुयादीम्ह साधना प्रधानया हने कथं पत्रकार दबू न वंगु दँनिसे साधना मिसा पत्रकारिता सम्मान ज्याझ्वः याःगु खः। दबू न वंगु च्यादँनिसे मिसा पत्रकारपिन्त सम्मान याना वयाच्वंगु खः। अथेहे दबूया बुलेटिन न ‘आज्जु’या उलेज्या उपप्रधान मन्त्री यादव, दबूया नायः श्रेष्ठ, आदिवासी जनजाती महासंघया न्वकु लामा व दबूया कानूनी सल्लाहकार किरण शाक्यपिन्स मंकाः कथं यानादीगु खः।

दबूूया केन्द्रिय नायः गलत इतिहासयात भिंकाः वास्तविक इतिहास स्थापित यायेत दबुलिं संघर्ष यानाच्वंगु व गलती मभिंकूतल्ले थःपिं सुम्क मच्वनेगु उद्घोष नं नायः श्रेष्ठं यानादिल । नेपाःया न्हापाम्ह मिसा पत्रकार साधना प्रधान व कामाक्षी देवीया पत्रकार ख्यलं गुवलय् लुमकिगु ज्या मजु धका धयादीगु खः।

नेपाल आदिवासी जनजाती पत्रकार महासंघया न्वकू अमरध्वज लामा, दबूया निवर्तमान नायः सुरजबीर बज्राचार्य, कानूनी सल्लाहकार किरण शाक्य, केन्द्रिय सल्लाहकार विजयरत्न असंबरे, दबूया यल कचा नायः मन्जु बज्राचार्यलिसें नं नुगःखँ तयादीगु खः। दबूया ल्यू छ्यान्जे लिसें ज्याझ्वः कजि सुनिता महर्जनं लसकुस यानादीगु खःसाः न्वकू रचना श्रेष्ठं सुभाय् न्वचु तयादीगु खः।

Categorized in राष्ट्रिय