२०८१ जेठ १२, शनिबार

पत्रकार महासङ्घया संस्थापक विषय याकन हे क्वछिइ निति संवाद ज्याझ्वः

नृपेन्द्रलाल श्रेष्ठ | चौलाथ्व चतुर्दशी ११४४, बैसाख १० सोमवाः

नेपाल पत्रकार महासङ्घया संस्थापक विषय याकन हे क्वछिइ माःगु माग यासे संवाद ज्याझ्वः जुगु दु। नेपाल आदिवासी जनजाति पत्रकार महासङ्घ (फोनिज) सङ्घीय समितिं थौ स्थापना दिवसया लसताय् संवाद ज्याझ्वः याःगु खः।

संस्थापक विषय संवेदनशील विषय जुगुलि याकन हे अध्ययन याना तथ्य व प्रमाणया आधारय् क्वछिइ माःगु सरोकारवाला पक्षया नेतृत्वं सुझाव बिउगु दु। संस्थापक विषय यक्को ई तक विवाद कायम जुयाच्वंगुलि उकियात क्वछिइमाः धका ब्बति काःपिन्स थःपिनिगु बिचाः तःगु खः।

उगु संवाद ज्याझ्वलय् नेपाल पत्रकार महासङ्घया अध्यक्ष विपुल पोखरेलं इतिहासयात कैद याये मिले मजुगु धका धासे छु द्धना च्वंगु दुसा भिंकेमाःगु व उकियात अध्ययन याना तथ्य व प्रमाणया आधारय् क्वछिइमाःगु बिचाः तयादीगु खः। थःगु नेतृत्वय् महासङ्घया कार्य समिति बैठकं गम्भीरतापूर्वक सहलह जुयाच्वंगु जुगुलि उकिइ मापदण्ड दयका निष्कर्षय् वनेत महासङ्घ तयार दु धका वयकलं धयादीगु खः।

अथेहे महासङ्घया पूर्व अध्यक्ष डा. महेन्द्र विष्टं थुगु विषय ताः ईनिसे खँ पिहावया च्वंगुलि दस्ताबेजया आधारय् निष्कर्षय् थ्यकेमाः धका वयकलं सुझाव बियादीगु खः। तत्कालीन नेपाल पत्रकार सङ्घ २००८ सालय् गठन जुगु विषय छु न विवाद मदुगु अय्न उकिया निरन्तरता आःया महासङ्घ खः कि मखु धइगु विषय जक खःगुलि क्वछिइत ल्यः दयाच्वंगु खः धका धयादीगु खः वयकलं धयादीगु खः। अथेहे उगु संवाद ज्याझ्वलय् फोनिजया निवर्तमान अध्यक्ष डण्ड गुरुङं इतिहास च्वयेगुलि द्धःगु दु सा उकियात भिंकेमाः उकिया लागि दक्को तयार जुइमाः धका धयादीसे दस्ताबेजया अध्ययन याना तथ्य व प्रमाणया आधारय् क्वछिइत महासङ्घया पदाधिकारीपि गम्भीर जुया न्ह्याः वनेमाःगु धका थःगु बिचाः तयादीगु खः।

फोनिजया अध्यक्ष गजुरधन राई न महासङ्घया संस्थापकया विषय फोनिजया जक एजेण्डा मखु पत्रकार सकसिगु मंकाः एजेण्डा खः धका धयादीसे संस्थापकया विषय निष्कर्षय् थ्यकेतय् हे थथे संवाद व स्थापना दिवस हनागु खः धका धयादीगु खः। उगु इलय् नेपाल पत्रकार सङ्घ वैशाख ९ गते स्थापना जुगुलि व हे दिंयात हे स्थापना दिवस कथं हनेगु निति सकसिगु कुतः व सकसिगु ग्वाहालि माः धका धयादीगु खः।

फोनिजया सल्लाहकार मनोज घर्ती न इतिहास स्यंकाः न्ह्यावनेगु सुयात न छुट मदुगु व द्धना च्वंगु इतिहासयात तत्काल सुधार यायेमाः धका धयादीसे वार्ता, संवादया आधारय् सहमतिइ थ्यकेत महासङ्घ व फोनिज निगु पक्ष गम्भीर जुया न्ह्यावंसा जक याकन हे समस्या समाधान जुइ धका धयादीगु खः। फोनिजया वरिष्ठ उपाध्यक्ष लक्की चौधरीं न्हापाया सङ्घ हे निरन्तरता थौया महासङ्घ जुगुलि समस्या समाधान यायेगुलि सकसिगु मंकाः कथं कुतः याना च्वनेमाः धका धयादीगु खः। नेपाल टुटेया सम्पादक सत्यनारायणबहादुर श्रेष्ठं थःगु कुतलं २००८ साल वैशाख ९ गते तत्कालीन पत्रकार सङ्घ गठन याःगु तथ्य, प्रमाण व लिखत दस्तावेजं पुष्टि यानाच्वंगु निष्कर्षय् वनेत लिबाके मज्यु धका वयकलं सुझाव बियादीगु खः।

फोनिजं नेपाल पत्रकार महासङ्घ पदाधिकारीपि नाप संस्थापक विषय क्वछिइगु निति वार्ता न सुरु याये धुकुगु दु। औपचारिक लिसे अनौपचारिक वार्ताय् सकारात्मक कुतः व विज्ञ टोली गठन याना उगु टोलीं बिउगु प्रतिवेदनया आधारय् निष्कर्षय् वनेमाःगु निगुलि पुचःया धापू दु।

संवाद ज्याझ्वःया सहजीकरण नेवाः पत्रकार राष्ट्रिय दवुया निवर्तमान अध्यक्ष सुरजवीर बज्राचार्यं यानादीगु खः।

Categorized in राष्ट्रिय