बागमती प्रदेशय् वइगु बैशाख २४ गते सोमवाःनिसें नेपालभाषा व तामाङ भाषायात सरकारी कामकाजि भाषाया रुपय् लागू जुइगु जुया उगु दिंयात उत्सवया रुपय् हनेत बागमती प्रदेशय् सार्वजनिक विदा बिइत माग याःगु दु।

नेवाः देय् दबू बागमती प्रदेश समितिया नायः विष्णुगोपाल महर्जन, नेपाल तामाङ घेदुङया बागमती प्रदेश नायः लिलाकुमार घलान व देय् दबू स्वनिगः विशेष प्रदेश समितिया नायः श्रीकृष्ण महर्जनं थौं बैशाख ११ गते मंकाः विज्ञप्ति जारीयासें उगु कथं माग यानादीगु खः।

बागमती प्रदेशय् नेपालभाषा व तामाङभाषा सरकारी कामकाजि भाषाया रुपय् बैशाख २४ गतेनिसें लागू जुइगु धइगु नेवाः व तामाङतय्गु नितिं जक मखु समग्र बागमती प्रदेशवासीया नितिं हे उत्सव खः धासें विज्ञप्तिइ उगु दिंयात बागमती प्रदेश नेवाः तामाङ भाषा दिवसया रुपय् हनेत तकं देय् दबूया जिल्ला समिति, पालिका समिति, तामाङ घेदुङया जिल्ला व पालिका समिति अले मेमेगु खलः पुचःयात तक अथे इनाप याःगु खः।

ता ई न्ह्यःनिसेंया आन्दोलन व बागमती प्रदेशया मुख्यमन्त्री, मन्त्रीपिं, सभामुखनिसें सांसद व सकलसिगु भूमिकाया कारणं हे भाषा ऐन वःगु व भाषा ऐन कथं आः बैशाख २४ गतेनिसें नेपालभाषा व तामाङ भाषायात सरकारी कामकाजि भाषाया रुपय् लागू यायेगु ज्या जूवनाच्वंगु खः धकाः तकं मंकाः विज्ञप्तिइ न्ह्यथनातःगु दु।

अथे हे देय् दबू बागमती प्रदेश समिति, नेपाल तामाङ घेदुङया बागमती प्रदेश समिति व नेवाः देय् दबू स्वनिगः विशेष प्रदेश समितिया मंकाः ग्वसालय् बैशाख २४ गतेया दिंनय् बागमती प्रदेशया राजधानी हेटौंडाय् बागमती प्रदेश नेवाः तामाङ भाषा दिवस हनेगु तयारी जुयाच्वंगु जानकारी विज्ञप्तिपाखें जानकारी बिउगु दु।

Categorized in राष्ट्रिय