भाषा आयोगया अध्यक्ष गोपाल ठाकुरं नेपाःया मातृभाषा म्वाइगु आधार नेपाली भाषा खः धका सार्वजनिक न्ववाःगुलि नेवाः देय् दबू स्वनिगः विशेष प्रदेशया अध्यक्ष नाप भाषिक अभियन्ता श्रीकृष्ण महर्जनं आपत्ती प्वकूगु दु।

आयोगया अध्यक्षया उगु धापू याकन हे लितकायेमाः धका वयकलं माग यानादीगु दु। लहनान्युजयात खँ ल्ह्यायेगु झ्वलय् अध्यक्ष महर्जनं नेपाःया संविधानं नेपालय् न्ववाइगु दक्को भाषा राष्ट्रभाषा धका धयाच्वंसा भाषा आयोगया अध्यक्ष ठाकुरं उगु धापू तःगुलि मातृभाषी समुदायपिन्स आपत्ति प्वकूगु खः।

बुधवाः नवलपरासीइ छगु ज्याझ्वः दथुइ भाषा आयोगया अध्यक्ष ठाकुरं नेपाली भाषा म्वात धासा जक मेमेगु भाय् न म्वायेत ताःलाइ धका धयादीगु खः। देय् दबू स्वनिगः प्रदेशया अध्यक्ष महर्जनं धयादीगु दु ‘नेपालय् नेपाली भाषां मेमेगु मातृभाषायात क्वत्यलातःगु दु।

भाषा आयोगं लोपउन्मुख भाषाया लागि भूमिका निर्वाह यायेमाःगुलि व नेपाःया दक्को मातृभाषायात म्वाकेगु व विकास यायेमाः मनूख खः नेपाली भाषा म्वाकेत मेमेगु मातृभाषा म्वाकेत अपुइ धका धया मेमेगु मातृभाषायात निगुगु थासय् तयेगु स्वगु दु’ धका धयादीगु खः।

Categorized in राष्ट्रिय