प्रधानमन्त्री केपी शर्मा ओलीं पोखरा व गौतमबुद्ध अन्तर्राष्ट्रिय विमानस्थल पूर्ण क्षमताय् सञ्चालनया निंतिं सम्बन्धित मन्त्रालयपाखें स्पष्ट योजना फ्वंगु दु।

सिंहदारबारय् च्वंगु प्रधानमन्त्री व मन्त्रिपरिषदया ज्याकुथिइ सम्बन्धित मन्त्री, सचिव व उच्च पदाधिकारीपिन्त त्रिभुवन अन्तर्राष्ट्रिय विमानस्थलया आःया उडान व यात्रु आवागमन व्यवस्थापन यायेत प्रधानमन्त्री ओलीं निर्देशन बिउगु दु।

सहलहय् प्रधानमन्त्री ओलीं निगू विमानस्थल निर्माण लिपा ताःईतक पूर्ण क्षमतां संचालन मजूगु, अले येँया विमानस्थलं क्षमता स्वयां अप्वः जुयाच्वंगु खँयात गम्भीरतापूर्वक कयाः माःगु सहजीकरणया निंतिं इनाप यानादीगु खः।

प्रधानमन्त्री ओलीं निगुलिं विमानस्थल प्रभावकारी कथं न्ह्याकेगु लागिु अध्यागमन लगायत मेमेगु सुविधा सञ्चालन यायेगु, विमानस्थल लिक्क इन्धन भण्डार मेथाय् यकेगु, हवाई इन्धनया भाः क्वकायेगु, मूल्य अभिवृद्धि कर व पर्यटन कर मकायेगु व्यवस्था यायेगु, ग्राउन्ड ह्यान्डलिङ्ग सेवा नियम कथं सुना कयावयाच्वंगु वयात हे बिइत निर्देशन बिउगु दु।सहलह लिपा प्रधानमन्त्री व मन्त्रिपरिषद्या ज्याकुथिया सचिव राजकुमार श्रेष्ठया संयोजकत्वय् सम्बन्धित फुक्क मन्त्रालयया सहसचिव दुथ्याःगु कार्यदलयात संचालनया योजना मेगु बैठकय् हयेत जिम्मेवारी बिउगु दु।

उपप्रधान लिस् अर्थमन्त्री विष्णुप्रसाद पौडेल, परराष्ट्रमन्त्री डा. आर्जु राणा देउवा, संस्कृति, पर्यटन लिसे नागरिक उड्ययनमन्त्री बद्रीप्रसाद पाण्डे, श्रम लिसे रोजगार मन्त्री शरतसिंह भण्डारी, प्रधानमन्त्रीया मुख्य सल्लाहकार विष्णु रिमाल, आर्थिक सल्लाहकार युवराज खतिवडा, नेपाल सरकारया मुख्यसचिव लीलादेवी गडटौला, प्रधानमन्त्रीया मू स्वकीय सचिव राजेश बज्राचार्य लगायतया नं ब्वति दुगु खः।

Categorized in राष्ट्रिय