यलय थौ राजोपाध्याय देव व्राम्हणतय् उपाकर्म गुथिपाखें न्ह्याका वयाच्वंगु नृसिंह जात्रा पिहा वइगु जूगु दु। दँय्दसं गुंलागा पञ्चमि कुन्हु पिदनीगु थुगु नृसिंह जात्रा थौं न्हिनसिया १२ बजेलिपा पूर्णचण्डीं पिहां वइगु जुगु दु।

उपाकर्मया गुथिया गुथियारपिंसं पाः फयाः न्ह्याकीगु थुगु जात्रा थुगुसी मदुम्ह नृपेन्द्रराज शर्माया पाः लाःगु दु । थुगुसी संचारकःमि राजीव राजोपाध्यायय् नृसिंह जुइत्यःगु दु। थुगु जात्राय् पाःलाःम्हेसिया जिलाजं नृसिंह जुइमाःगु परम्परा दु।

पूर्णचण्डीं सुरुजुइगु जात्रा गाःबहाः, प्यंगःथां, पिम्बहाः, बालिफः, नकबही, क्वालखु, झटापोल, क्वन्ति, क्वबहाः, स्वथ, मंगलबजाः, हःखा, लुँहिति, ओकुबहाः, थैना, चक्रबही, टंगः, तिछुँगल्ली, इखालखु, जेनबहाः, वला जुयाः पूर्णचण्डी हे थ्यंकाः क्वचायेकी ।

Categorized in राष्ट्रिय