क्रिकेटय् बङ्गलादेशं पाकिस्तानयात ऐतिहासिक कथं त्याकूगु दु। टेस्ट क्रिकेटय् बङ्गलादेशं पाकिस्तानयात न्हापागु पटक बूकुगु दु।

पाकिस्तानं बिउगु ३० रनया लक्ष्य बङ्गलादेशं थौ न्यान्हुया दिं चिया त्वनेगु इलय् छगु विकेटय् पूरा याउगु खः। बङ्गलादेशका जकिर हसन १५ व शद्मान इस्लामं ९ रन दयकूगु खः।

टस बूया न्हापां ब्याटिङ याःगु पाकिस्तानं न्हापागु पारीइ मोहम्मद रिजवान व सउद शकीलं शतक व सैम अयुबया अर्धशतकया ग्वहालिं खुगु विकेटय् ४ सय ४८ रन दयका पारी क्वचागु घोषणा याःगु खः। न्हापागु पारीइ बङ्गलादेशया शोरिफुल इस्लाम व हसन महमुदं निगु निगु विकेट काःगु खः।

बङ्गलादेशं न्हापागु पारीइ मुश्फिकर रहमानया शतक व शद्मान इस्लाम, मोमिनुल हक, लिटन दास व मेहदी हसन मिराजपिनिगु अर्धशतकया ग्वहालिं ५ सय ६५ रन दयकूगु खः।न्हापागु पारीइ पाकिस्तानया नसीम शाहं स्वंगू व शाहीन बाह अफ्रिदी, खुर्रम शहजाद व मोहम्मद अलीपिन्स निगु विकेट काःगु खः।

अथेहे पाकिस्तानया निगु पारीइ १ सय ४६ रनय् अल आउट जूगु खः। पाकिस्तानया मोहम्मद रिजवानं दकलय् अप्पो ५१ रन दयकूगु खः। निगुगु पारीइ बङ्गलादेशया मेहदी हसन मिराजं प्यंगु व शकिब अल हसनं स्वंगू विकेट काःगु खः।

पाकिस्तान व बङ्गलादेशया दथुइ निगुगु व लिपागु टेस्ट क्रिकेट वइगु अगस्ट ३० निसे रावलपिन्डीइ शुरू जुइ।

Categorized in कासा