नेवाः पत्रकार राष्ट्रिय दबू वंगु आइवाः राष्ट्रपति रामचन्द्र पौडेल व सञ्चार, सुचना तथा प्रविधि मन्त्री पृथ्वी सुब्बा गुरुङया ध्यानाकर्षण पौ बिउगु दु।

दबूया अध्यक्ष नृपेन्द्रलाल श्रेष्ठया नेतृत्वय् वंगु पुचलं राष्ट्रपति निवासय् वनाः ध्यानाकर्षण पौ लःहःगु खः। ध्यानाकर्षण पौ लःल्हानाः कासें राष्ट्रपति पौडेलं नेपालय् दुगु थीथी मांभाया विकास व संरक्षण नितिं थम्हं सरकारया ध्यानाकर्षण यायेगु बचं बिसें धयादीगु दु, ‘नेपाः थीथी जातजाति दुगु बहुभाषिक, बहुसांस्कृतिक, बहुधार्मिक देय् जूगुलिं थीथी भाय् व संस्कृतिया विकासया नितिं संविधानया संरक्षक जूगु सरकारया ध्यानाकर्षण याकेगु जुइ।’ उकथं हे राष्ट्रपति पौडेलं थीथी मांभासं पिहां वःगु पत्रपत्रिकाया कारणं सम्बन्धित भाषा, साहित्य, संस्कृतिया विकासय् योगदान याःगु खँ नं धयादीगु दु।

वय्कलं समावेशी व मातृभाषाया पत्रकारिताया नितिं ज्या याना वयाच्वंगु मैथली व नेपालभाषाया बहुसंख्यक भाषाह्यःमिया कारणं पत्रकारिता, साहित्य, दर्शन व इतिहास समृद्ध जुयाः वनाच्वंगु खँ नं धयादीगु दु। ध्यानाकर्षण पौयात कयाः दबूया वरिष्ठ उपाध्यक्ष सुनिल महर्जनं राष्ट्रपति संविधानया संरक्षक जूगुलिं संविधानं बियातःगु हक अधिकार कथं सरकारया फुक्कं निकाय समावेशी जुइमाःगु, थीथी मांभाय्या पत्रकारतय्त दुथ्याकाः समाचारकक्ष समावेशी याय्माःगु सरकारं दयेकीगु थीथी आयोग प्रतिष्ठान लगायत सरकारी ज्याकुयात समावेशी यायेमाःगु सरकारं सञ्चार माध्यमयात बिया वयाच्वंगु अनुदानय् मांभाय् पत्रपत्रिकायात विशेष अनुदान बीमाःगु खँ न्ह्यब्वयादीगु खः।

उकथं हे वरिष्ठ उपाध्यक्ष महर्जनं मांभासं पत्रकारित शुरु जूगु सछिदँ क्यंगु व न्हापांगु मांभाय्या पत्रकारित धर्मादित्य धर्माचार्यं कलकत्ता ‘बुद्धधर्म’ जानकारी राष्ट्रपति पौडेलयात याकादीगु खः। उकथं हे वय्कलं नेवाः पत्रकार राष्ट्रिय दबूं थुगु दँयात मातृभाषा पत्रिका दिवस कथं हनाच्वनागु। छं ई न्ह्यः नेपालय् ग्वसाः ग्वःगु अन्तर्राष्ट्रिय मातृभाषा पत्रकार सम्मेलनं पारित याःगु घोषणा पौया बारे राष्ट्रपतियात जानकारी याकादीगु खः। उकथं हे सञ्चार तथा सूचना प्रविधि मन्त्री गुरुङं नेपाःया सञ्चार माध्यम व सञ्चार सम्बद्ध संघ संस्थायात समावेशी चरित्रया दय्केत थम्हं कुतः याय्गु खँ धयादीगु दु।

वय्कलं नेपाःया सञ्चार माध्यम व सञ्चार सम्बद्ध संघसंस्था समावेशी चरित्रया मजूगुलिं फुक्कं समुदायया सःया प्रतिनिधित्व मजुयाच्वंगु धासें उकिया नितिं थम्हं कुतः यायेगु खँ धयादीगु खः।लिसे वय्कलं मातृभाषा पत्रकारित विकासया नितिं थः सकारात्मक जूगु धासें नेपाल टेलिभिजनय् नेपालभाषाया समाचार तय्गु बचं नं दबूया प्रतिनिधियात बियादीगु दु। नेवाः पत्रकार राष्ट्रिय दबू लःल्हाःगु च्यागू बुँदाया ध्यानाकर्षण पतिइ सरकारं बीगु लोक कल्याणकारी विज्ञापन बीबलय् मांभासं नं अज्याःगु विज्ञापन बीमाःगु माग याःगु खः।

उकथं हे सञ्चार मन्त्रालयपाखे पत्रकार सम्बद्ध संघसंस्थायात बियाच्वंगु अनुदान जातीय पत्रकार संघयात नं बीमाःगु, नेपाःया न्हापांम्ह मांभाय्या पत्रकार धर्मादित्य धर्माचार्यया हुलाक टिकट पिथनेमाःगु माग नं दबू याःगु दु।