थीथी सहकारीपाखे यक्वः बचतकर्तातय्गु बचत यानातःगु ध्यवा हिनामिना यानाः नीप्यम्ह विदेशय् बिसिउँ वनाच्वंगु दु।

जिबी राईं जक हे १६ अर्ब दुरुपयोग याःगु द्वपं बियातःगु दु। राईं येँ, पोखरा, वीरगञ्ज, बुटवल नाप यक्वः शहरय् सहकारी संस्थाय् सर्वसाधारण जनतां बचत यानातःगु ध्यबा हिनामिना याःगु खः। अय्न प्रहरीं राईयात आःतक ज्वनेफुगु मदुनि । प्रारम्भिक अनुमान कथं राई मलेसियाय् सुलाच्वंगु दु। तत्कालीन गृहमन्त्री रवि लामिछाने नं मलेसियाया गृहमन्त्रीलिसे खँल्हाबल्हा जूगु खः तर राईयात नेपाः हय्मफुगु खँ धाःगु खः।बिसिउँ वनाच्वंपिं नीप्यम्ह मध्ये अप्वः धइथें भारतं पिने वनाच्वंगु अनुमान नेपाःया प्रहरीं याःगु दु। भारतय् च्वनाच्वंपिंत नेपाःया प्रहरीयात लःल्हाय्त भारतीय प्रहरीयात अःपुइगु खः।

तर मेमेगु देशय् थ्यने धुंकूपिन्त कूटनीतिक पहल यानाः हे नेपालय् हयेमाः। थज्याःगु कुतः नेपाल प्रहरीं मखु, सरकारं हे यायेमाः। बिसिउँ वःपिं मध्ये पोखरा व बागलुङय् सहकारी संस्था संचालन यानाच्वंम्ह देव नेपालीं उगु ध्यबा पुलेत सार्वजनिक अपिल याःगु दु। वय्कलं याःगु अपिल धइगु थःगु सम्पत्ति मियाः भुक्तानी यायेत खः। उकिया निति सरकारं वातावरण दय्केमाः। मेखे देशय् दुपिंत नं प्रहरीं ज्वनाः हिरासतय् तयातःगु दु। उकिं मध्ये आपालं जेलय् दु।संचालकतय्त जेलय् तःसां नं सर्वसाधारणया ध्यबा लित बीफयाच्वंगु मदु। विशेष यानाः अपराधी व ठगे याइपिंत ज्वनाः जेलय् छ्वयाच्वंगु दु।

थुकिया नापनापं सर्वसाधारणया ध्यबा लित बीत सरकारं कुतः यायेमाःगु खः। थ्व धाःसा जुयाच्वंगु मदु। आपालं सहकारीया थःगु हे सम्पत्ति दु। अले सम्पत्ति दुगु सहकारीया सम्पत्ति मियाः जूसां जनताया ध्यबा लित बिइमाः। प्रहरी अज्याःपि ठगतय्त ज्वनाः उमिगु सम्पत्ति मियाः जनताया ध्यबा लित बीगु कुतः याय्माः। तर उकिया नितिं सरकारं ठोस योजना हःगु खनेमदु। सहकारी पीडिततय्सं थःगु बचत ध्यबा लित बीमाल धकाः सः थ्वय्कूगु निदँ दयेधुंकल। सतकय् वया सः तयेगु ज्या दिकूगु मदुनि। तर सरकारय् च्वंपिसं छगू सहकारी हे समस्या ज्यंके फयाच्वंगु मदु।

संसदीय छानविन समितिं भदौ ५ गते दुने प्रतिवेदन तयार यानाः सरकारयात लःल्हाय्त्यंगु दु। अनुसन्धानं दोषी ठहर जूपिंत कारवाही यायेगु जिम्मेवारी सरकारया खः। मुख्य खँ सर्वसाधारणया बचत लित बीगु खः। उकिया नितिं बिसिउँ वनाच्वंपि सहकारी संचालकतय्त ज्वनेमाः।