यं या नखः व वसुन्धारा या व्रत
जितेन्द्रबिलास बज्राचार्य | ञंलाथ्व चतुर्दशी ११४४, असोज १ मंगलवाः
यँयाः अर्थात इन्द्रजात्रा थ्व नखः वसुन्धरा व्रत नाप अतिकं स्वापू दु । वसुन्धरा व्रत मदुसा यँयाः इन्द्रजात्रा नं धाइ मखु जुइ । वा मेमेगु हे नामं चले जुइगु जुइ ।
जात्रा धाय्वं छुं नं सावर्जनिक प्रर्दशन याय्गु जुइ । थ्व अप्वः धइथें बांलाःगु जुइसा छु बामलाःगु जुइ । गथे कि सुयातं बेइज्जत याय्माल धाःसा जात्रा न्याय्काबी धकाः धाइगु चलन दु । भाद्र कृष्ण पक्ष तृतिया गातिला कुन्हु वसुन्धरा द्यःया धलं दनाः चतुर्थी कुन्हु धुंकी । थौं कन्हय् छन्हु हे धुंकेगु चलन दु । थ्व नेपाल मण्डलया छगू बिस्कं कथंया व्रत नं खः । थ्व न्हिं कुन्हु व्रत च्वनाः थीथी कथंया बाखं कनेगु नं याः । नेवाःतय्सं लक्ष्मी द्यः भापिया पूजा याइ। वसुन्धरा द्यःया स्वपाः ख्वाःपाः व खुका ल्हाः दु । अन्न, रत्न, व धनं सम्पन्न जुइमाः धकाः कामना यासें धलं दनी । थ्व व्रतया विशेषता धइगुु दक्वं म्हासुसे च्वनेगुलिं खः । वसः नं म्हासुइ ।
थ्व व्रत च्वनिबलय् थीथी कथंया स्वां छाइ । उकि मध्ये मदय्कं मगाःगु स्वां खः पालिजाः स्वां । थ्व तुयूगु जि स्वां थें जुयाः वास वःसां चु म्हासुसे च्वनि । थ्वयात लुँ वहःया प्रतिक कथं माने याइ । वसुन्धरा देवीया महिमा न्यनाः स्वर्गया जुजु इन्द्रया मां तारा डाकिनिनं वसुन्धरा द्यःया धलं दनेगु मनसुवा तयाः माःगु सामाग्री चूलाकी । उकी मध्ये मदय्कं मगाःगु पालिजाः स्वां नेपाल मण्डलय् जक दुगुलिं काय् इन्द्रयात स्वां काय्त नेपालय् छ्वया हइ ।
इन्द्र नेपाल मण्डलय् कुहां वयाः स्वइबलय् येँया मरुत्वालं क्वय् भौक्यबल् स्वां ह््वयाच्वगु खनी । तर स्वांया मालिक खनि मखु । वं स्वां खुइ । अबलय् क्यब थुवालं इन्द्रयात खनी । स्वां खुँ धकाः पाःयानाः थामय् चिनाबी । अथे जुयाः आःतक नं पालिजाः स्वां थ्वयाः काइमखु । बँय् हायाच्वगु स्वां मुनाः हे द्यःयात छाय्गु याइ । तर मेमेगु हाःगु स्वां द्यःयात छाइ मखु ।
इन्द्रया बहान ऐरावत किसिं इन्द्रयात ताः ई तकं नं मवय्वं उखे थुखे माः जुइ । ऐरावत किसिं इन्द्रयात माःवंगुया प्रतिक कथं हे पुलुकिसि प्याखं ल्हुइकीगु खः ।
देवराज इन्द्रया मां काय् मवःगुलिं नेपाल मण्डलय् वयाः माः वइ । उबलय् इन्द्रयात थामथ् चिनातःगु खनी । इन्द्रया मां नं इन्द्रयात त्वःता बीत इनाप याइ । थ्व खँ जनता सिइका स्वां खूवम्ह इन्द्र खः अले काय्यात त्वःतकेत वम्ह इन्द्रया मां खः धकाः सीकी । मांम्ह डाकिनी तुयू वसः पुनातःम्ह खः । उकिं यानाः हे दागिं नं तुयूगु ख्वाः पुइसा तुयूगु हे वसः फिइ ।
खुइगु तःधंगु पाप खःसा खुइकुम्ह नं पापया भागिदार खः । थ्व न्ह्याम्ह हे जूसां गलत ज्या याम्ह द्यः हे जूसां सजाय बीमाः धकाः क्यनातःगु खः । डाकिनियात जनता म्हसिके धुंकाः थः मदुपिं छेँजःपिंत स्वर्गय् यंकी धकाः डाकिनिया लिउलिउ। दागिं धयागु दाग लगे जूम्ह धकाः धाय्गु याः। इन्द्रया मांयात खुँ दाग लगे जूगुलिं शव्दया अप्रभसं जुयाः दागिं जूगु धइगु धापू दु। उकिं दागिंयात निम्हेसिनं निखेरं ज्वनाः देय् चाःहिकी।
इन्दजात्रा बलय् प्याखँ ल्हूइम्ह मजिपाः लाखे दागिंया बाजं सः ताय्वं सूवनिगु चलन दु। छाय धाःसा लाखे नं देव पुत्र खः। उकि डाकिनि नं खन कि स्वर्गय् यंकी धकाः लाखे सूवनिगु खः। दागिं वना यंकि दहलय् तक थ्यनकि मनूत लिउलिउ वय्गु त्वःति मखु। मनूतय्सं थःपिंत नं स्वर्गय् यंकी धाइ। इन्द्रया मामं म्वाःपिं मनूतय्त स्वर्गय् यंकेमज्यू धाइ।
यंकि दहलय् म्वः ल्हुल धाःसा पितृ स्वर्गय् वनी धकाः धाइ । म्वःल्हु तले खसु वा वय्काः मनूतय्त छले यानाः इन्द्रया मां काय् ब्वनाः स्वर्गय् वन धकाः धाइ । मेगु कथं धाय्गु खःसा खसु यानाः वा याकनं पाके जुइ धकाः धाइ । इन्द्रजात्रा निसे खसु वइ। अन हे गनेद्यः स्थापना यानाः गनेद्यःयात साक्षि तःगुलिं उम्ह गनेद्यःयात इन्द्र विनायक धाइ।
इन्द्र जात्राय् मेम्ह छम्ह नं दागिं पिहांवइ। थ्व न्हरा पंचदान याय्गु दँय् जक पिहां वइ। थ्व खास यानाः दागिं मखु देवराज इन्द्र खः । उकिं थुइगु ख्वाः ह्याउँसे च्वनी। दानयात धाःसा स्वर्गया सुख भोग याये खनी धयागु श्लोक दु। व श्लोक कथं पंचदान न्हरा याम्हेसित इन्द्र याना देय् चाःहिकीगु खः।
