खोनाय् समाजसेवी देवबहादुर डंगोलया प्यक्वःगु पुण्य तिथिया झ्वलय् छगू ज्याझ्वः जूुगु दु।

देवबहादुर डंगोल स्मृति कोषया ग्वसालय् जूगु उगु ज्याझ्वलय् खोनाया धार्मिक व सामाजिक ख्यलय् थीथी कथं योगदान बिउपिन्त सम्मान नं देछाःगु खः। कोषया नायः पद्म बहादुर डंगोलया सभाध्यक्षताय् जूगु उगु ज्याझ्वलय् बागमति प्रदेशया श्रम, रोजगार व यातायातमन्त्री प्रेमभक्त महर्जन मूपाहाँ कथं झायादीगु खः।

ज्याझ्वलय् भन्ते सुधिरों च्वयाः बिज्याःगु “त्रिरत्न वन्दना परित सुत्त र असल सम्पत्ति पहिचान” सफूया नं पितब्वज्या जूगु खः। खोनाया कान्छा कृष्ण डंगोल, लःमुना पुचः लगायतयात सम्मान याःगु उगु ज्याझ्वलय् सांस्कृतिक सम्पदाया बारे छगू वक्तृत्व कला कासा नं जूगु खः। उगु कासाय् सुभा श्रेष्ठं सर्वोत्कृष्ट सिरपाः त्याकुगु खःसा सुबि मल्ल व सरल दुलालपिन्त हःपाः सिरपाः बिउगु खः।

ज्याझ्वलय् मूपाहाँ प्रेमभक्त महर्जन व पाहाँपिं सांसद रघुनाथ महर्जन व लोककवि राजभाई जकःमि, संस्कृतिकःमि बदन लाल ङ्याछ्योंपिन्सं खोनाया सांस्कृतिक पक्ष व समाजसेवी देवबहादुर डंगोलया योगदानयात कया नुगःखँ तयादीगु खः।

Categorized in राष्ट्रिय