नेपाल संवत् ११४५ मू समारोह समितिं नेपाल संवत्या मौलिकता व महत्वयात अन्तर्राष्ट्रिय तहलय् प्रवद्र्धन यायेत कूटनीतिक नियोगतय्त इनाप याःगु दु।

हरेक दँय् कात्तिक शुक्ल प्रतिपदा कुन्हुनिसें न्ह्याइगु नेपाल संवत्यात प्रचारप्रसार हयेगु ज्या यायेत समितिं विदेशय् च्वंगु नियोग तय्त इनाप याःगु खः। समितिया नायः राजेन्द्र श्रेष्ठं राष्ट्रिय विभूति शङ्खधर साख्वालं ९३७ सालय् गरिब जनताया त्यासा पुलाः प्रचलनय् हःगु नेपाल संवत्या मौलिकता व महत्वयात संरक्षण यानाः राष्ट्रिय व अन्तर्राष्ट्रिय तगिंमय् प्रवद्र्धन यायेत दक्वः नियोग तय्त इनाप याना दीइगु दु।

वय्कलं नेवाः समुदायं देयन्यंक थी थी ज्याझ्वः यानाः न्हूदँया कथं न्याय् किइगु संवत् नेपाःपाखें नीजूगुलिं थ्व संवतयात छ्यलेगु ज्या अप्वयेकाः यंकेमाःगु खँय् बः बियादिल। समितिं थ्वहे कात्तिक १७ गते बसन्तपुरय् ग्वसाः ग्वइगु मू समारोहय् ब्वति कायेत मातहतया सङ्घसंस्थातय्त थःगु थासं परम्परागत बाजा, झाँकी व सांस्कृतिक वेशभूषानापं वयेत उजं ब्यूगु दु। उगु समारोहयात प्रधानमन्त्रीं सम्बोधन याइगु ज्याझ्वः दु।

विसं २०५६ य् तत्कालीन प्रधानमन्त्री कृष्णप्रसाद भट्टराई नेतृत्वया सरकारं साख्वाःयात राष्ट्रिय विभूति घोषणा याःगु खः। २०६५ सालय् प्रधानमन्त्री पुष्प कमल दाहाल ‘प्रचण्ड’ नेतृत्वया सरकारं नेपाल संवतयात राष्ट्रिय मान्यता बियागु घोषणा याःगु खः। समितिपाखें अन्तक्र्रिया, गोष्ठी, भिंतुना कालबिल ज्या याना वयाच्वंगु दु।

Categorized in राष्ट्रिय