नेवाःतय्गु तधःगु नखः मोहनि व स्वन्ति वल कि अप्वः धइ थें तिथि बिबाद वय्गु याः। मोहनिया इलय् न अष्टमि व नवमि छन्हु हे लाउगुलि येँ च्वपिंस छन्हु लिपा हनं, यल व ख्वपय् छन्हु न्ह्यः हनेगु ज्या जुल। अथे हे स्वन्ति वयेत्यंगु दु।

स्वन्ति न येँ च्वपिंस छन्हु लिपा हनेत्यःगु दु सा यल व ख्वपय् च्वपिंस छन्हु हे हनेत्यःगु दु। लिपागु इलय् नखः हनेगु झ्वलय् तिथियात काय्गु कि तिथि ज्वना वःगु घडि पलायात कया नखः हनेगु धइगु बिषय कया स्वनिगःया नेवाःत बिभाजित जूगु खनेदु। छु दँ निसे घडि पलाः कथं नखः हनेगु याना हलं वयालिपा नेवाःतय्गु नखः हनेगु ज्या स्यनावंगु खनेदु।

छगू कथं धाय्गुखःसा नेवाःतय्स हनेगु नखः न्हापानिसे गडबड याय्गु ज्या याना वयाच्वंगु खनेदु। नेवाःतय्स तजिक हनिगु नखः मोहनि, स्वन्ति नाप मेमेगु नखःयात न स्यकेगु ज्या पंचाङ्ख समिति याना वयाच्वंगु खनेदु। गथेकि नेवाःतय्स हनिइगु नखः मोहनिया इलय् अप्टमी कुछि भ्वय्, नवमि कुन्हु स्याकूत्याक्वः व दशमि कुन्हु चालं याय्गु याइ।

नेवाःतय्स अष्टमी बहनि कुछि भ्वय् कुन्हु सकल परिवारया जःपि मुना कुछि भ्वय् नय्गु याइसा नवमिइ बहनि सिइकाभू यानाः भ्वय् नय्गु याइ। थ्व परम्परा धाःसा नेवाःतय्स जक हनेगु याइ जूगुलि अप्वः थें गडबड जुइगु याः। दशमि सकसित माःगुलि आःतक गुबलय् नं तिथि मदया गडबड जूगु मदु। अथेहे स्वन्तिइ सकसिया लक्ष्मी पूजा हनिइगु याइ, म्हपूजा नेवाःतय्स जक हनेगु याइ। पंचाङ्ख समितिं अप्पः थें यानाः म्हपूजा गडबड याय्गु ज्या याना वयाच्वंगु दु। थथे बिबादं यानाः नेवाःतय्गु नखः हनेगुलि समस्या वयाच्वंगु तःदँ दय्धुकल।

नखः हनेगु न्ह्यः जक तिथिया खँ ल्हाय्गु याइ। नखः सिधय्का वास्ता मयाइगुलि नखः हनेगुलि पानाच्वंगु दु। क्यालेण्डर दय्केगु इलय् छथाय् च्वना खँ ल्हाय्गु याःसा बिबाद म्हो जुइफु। उकि न्ह्यावलय् बिबाद जक मयासे समस्या ज्यकेत पंचाङ्ख समिति नाप छथाय् च्वनाः सहलह ब्याकाः इलय् हे तिथि क्वःछिइगु बांलाइ।