राष्ट्रपति रामचन्द्र पौडेलं हिमालया सुरक्षा धइगु हे पृथ्वीया सुरक्षा खः धैगु खँ लुमंकेत विश्व समुदाययात इनाप यानादीगु दु। अजरबैजानया बाकु सहरय् थ्व हे कात्तिक २६ गतेनिसें न्ह्याःगु जलवायु ह्यूपाः सम्बन्धी संयुक्त राष्ट्रसङ्घीय संरचना महासन्धि पक्ष देय्तय्गु २९ गूगु सम्मेलन (कोप–२९) य् विश्व नेतातय्गु उच्च स्तरीय सत्रयात मङ्गलवाः संबोधन यानाः राष्ट्रपति पौडेलं अथे इनाप यानादीगु खः।

राष्ट्रपति पौडेलं धयादिल, “च्वापुगुँया निति सुरक्षा धइगु हे पृथ्वीया सुरक्षा खः धइगु खँ सकसिनं मनन याये, गुँ देय्या तुयूगु च्वापुगुँ हाकुगुँइ परिणत जुइगु झ्वलय् उगु देसय् जक मखु क्वय्च्वंगु तटीय देय्तय्त नं सङ्कट जुइ धइगु वास्तविकता विश्वं ल्वःमंके मज्यू।” वय्कलं थुकिया लागि च्वापुगुँनिसें समुद्रतकया मुक्कं व समष्टिगत अनुकूलन अवधारणायात औपचारिक खँल्हाबल्हाया विषय दयेकेत तकं उगु सम्मेलनय् प्रस्ताव तयादिल।

नापं, नेपालपाखें थ्व हे अवधारणाया लिधंसाय् सगरमाथा खँल्हाबल्हा ज्याझ्वः न्ह्याकेत कुतः यानाच्वन धकाः वय्कलं न्ह्यथनादिल। राष्ट्रपति पौडेलं थः जलवायु न्याय व क्षतिपूर्तिया सः ज्वनाः थुगु सम्मेलनय् ब्वति काः वयागु खः धकाः कनाः धयादिल, “गोलाबारुदय् खर्च जुयाच्वंगु तःधंगु स्रोतसाधन जलवायु ह्यूपाःया नकारात्मक लिच्वः म्ह्वः यानाः मानव सभ्यतायात बचे यायेत उपयोग जुइमाः।”

जलवायु ह्यूपाःया समस्यां पृथ्वी हे सङ्कटय् लानाच्वंगु वय्कलं धयादिल । विशेष यानाः गरीव, अल्पविकसित, विकासशील व चिचिधंगु टापु देय्त थुकिया स्याःचालं अप्वः प्रभावित जूगु वय्कःया धापू दु। “तसकं म्ह्वः कार्बन उत्सर्जन यायेगु, तर अप्वः नकारात्मक असर जूगु विरोधाभासपूर्ण अवस्थाय् नेपाः लानाः च्वंगु दु”, राष्ट्रपति पौडेलं धयादिल। उगु सत्रय् अजरबैजानया राष्ट्रपति इलहाम अलियेपंm लसकुस यानादिल धाःसा संयुक्त राष्ट्र सङ्घया महासचिव एन्टेरियो गुटरेसलिसें विश्वका थी थी देय्या राष्ट्र प्रमुख व सरकार प्रमुखतय्सं संबोधन यानादीगु खः।(रासस)

Categorized in राष्ट्रिय