इस्का र हिट किक बक्सिङ निगुलिं कासाय् हलिंत्याकामि जुइफुम्ह अविरल घिमिरे ‘हिमचितुवा’ बिहीबाः नेपाः वयेत्यंगु दु।

किक बक्सिङ कासा ख्यलय् ऐतिहासिक कीर्तिमान दयेकेत तालाःम्ह नेपाःया ल्याय्म्हम्ह किक बक्सर घिमिरे जापानया नागोयाय् च्वनाः वयाच्वंगु खः। ‘हिमालय चितुवा’ घिमिरें इन्टरनेसनल स्पोर्टस् किक बक्सिङ एसोसिएसनं नागोया कंग्रेस सेन्टरय् वंगु कात्तिक १० गते जूगु ‘इन्टरनेसनल किक बक्सिङ’ (इस्का) धेंधेंबल्लाय् उपाधि त्याकाः हलिंत्याकामि जुयादीगु खः।

थ्व धेंधेंबल्लाय् वय्कलं फ्रान्सया प्रतिद्वन्द्वी एन्टोनिन मार्कोनीयात बुकाः ‘वल्र्ड च्याम्पियन’ जुइत ताःलाःगु खः। थुकिया निंतिं बक्सर घिमिरें थःगु हे खर्चय् थाइल्याण्डया फुकेटय् च्वंगु टाइगर मोओथाई अन्तर्राष्ट्रिय क्लबय् निलाया विशेष बन्द प्रशिक्षण काःगु खः। थ्व प्रशिक्षण काःम्ह वय्कः न्हापांम्ह नेपाली बक्सरतकं जुयादीगु खः।

इस्काया उपाधि त्याकेधुंकाः बक्सर घिमिरें थः अबु व मू प्रशिक्षक देव घिमिरे, थःम्हं प्रशिक्षण कयाच्वंगु सिमुरा डोजो, हलय् वयाः हःपाः ब्यूपिं सकल नेपाःमित, कोरियन नापं जापानी कासा यःपिं सकसितं विशेष सुभाय् बियादिल। ‘हिमालय चितुवा’ धकाः लोकंह्वाःम्ह घिमिरे उगु धेंधेंबल्लाय् ब्वतिकाःम्ह न्हापांम्ह नेपाःया बक्सर जुयादीगु खः।

धेंधेंबल्लाःया मू आकर्षण कथं जूगु लिपांगु कासा (मेन इभेन्ट म्याच) य् घिमिरें न्हापांगु चरणय् थः प्रतिस्पर्धी मार्कोेनीयात रिंगय् क्वःथलाः ‘अन्तर्राष्ट्रिय किक बक्सिङ’या उपाधि त्याकादीगु खः। आःतक प्रोफेसनल किक बक्सिङ हिट धेंधेंबल्लाया १४ गू कासाय् मबूसे त्याःम्ह हिमचितुवां प्यक्वः हिट धेंधेंबल्लाया ‘टाइटल म्याच’या उपाधि (बेल्ट) तकं रक्षा यासें ‘मिडल वेटया रेकर्ड’ तकं दयेकेत ताःलाकूगु खः।

वय्कलं लोकंह्वाःगु के वान प्रोफेसनल किक बक्सिङ धेंधेंबल्लाय् म्हिताः निगू इभेन्ट थःगु पक्षय् लाकाः प्रतिस्पर्धीयात ‘नक आउट’ यायेत ताःलाःगु खः। आःतक फ्रान्स, जापान, दक्षिण कोरिया, ब्राजिल, बोलिभिया, नेदरल्यान्ड, थाइल्यान्डलिसें देय्या बक्सरतय्त बुके धुंकूम्ह ल्याय्म्हतय्गु पुस्ताया लोकंह्वाःम्ह कासामि घिमिरें अन्तर्राष्ट्रिय प्रतियोगिताय् नेपाःया ध्वाँय् ब्वयेकाः हलिमयय् नेपाःयात म्हसीकादीगु दु।

जापानया नागोयाय् अविरलं थः अबु पूर्व अन्तर्राष्ट्रिय किक बक्सर नापं फुल कन्ट््याक कराते कासामि देव घिमिरेया विशेष प्रशिक्षणय् च्वनावयाच्वंगु खः। कराते खेलाडी देव सन् २००४ य् कोरियाया सोलय् जूगु ‘के वान प्राफेसलन किक बक्सिङ धेंधेंबल्ला’ य् ब्वति काःम्ह न्हापांम्ह दक्षिण एसियाली कासामि खः। चन्द्रागिरि नगरपालिका–१२ गुर्जुधारा बलम्बूइ वय्कःया छेँ खः।

थौंकन्हय् थः छेँजःपिंलिसे वय्कः जापानया नागोयाय् च्वनावयाच्वंगु दु। लिपा नेपालय् च्वनीबलय् अविरलं थःगु अनुभव न्हूगु पुस्ताया बक्सरतय्त स्यनेकने यानाः हे दिइ धाःगु ख.दु।(रासस)

Categorized in कासा