नेकपा (एमाले)या महासचिव शङ्कर पोखरेलं देय्यात भ्रमय् तइगु षडयन्त्रया विरुद्ध एमालें जागरणसभा याःगु खँ कनादिगु दु।

नेकपा एमालें स्वनिगःया थीथी जिल्ला कमिटीं थौं थन याःगु ज्याझ्वलय् महासचिव पोखरेलं म्वाः मदुगु षडयन्त्रयात फायेत जागरणसभा ग्वसाः ग्वःगु खँ धयादिगु खः। वय्कलं देय्या मू निगू तःधंगु राजनीतिक दल नेपाली कांग्रेस व नेकपा (एमाले) मिले जुयाः देय्यात राजनीतिक निकास बिइत जुया च्वनागु इलय् थी थी षडयन्त्र जुयाच्वंगुलिं सचेत जुइत इनाप यानादिल।

देय् व राष्ट्रियताया पक्षय् जुयाच्वनागुलिं एमालेयात हयकायेया कुतः जूगु न्ह्यथंसें महासचिव पोखरेलं धयादिल, “झीगु पार्टीयात प्यखेरं चाकलय् लाकेत हयकाये वयाच्वंगु दु, एमालेयात सिधयेकेत थी थी षडयन्त्र जुयाच्वंगु दु। एमालेविरुद्ध च्वयेकूगु फुक्कं भ्रम फायेत पार्टी झ्वः छवाः जुइमाःगु ई वःगु दु।”

महासचिव पोखरेलं एमालेया अध्यक्ष केपी शर्मा ओली प्रधानमन्त्री जूबलय् आर्थिक प्रगति याइगु देय्तय्गु धलखय् नेपाः लाःगु प्रसङ्ग न्ह्यथंसें धयादिल, “देय् दयेकीगु पार्टी एमाले खः, ज्या याइपिंत ज्या ब्यु धाये फयेकेमाः, अले तिनि देय् भिनां वनी।” महासचिव पोखरेलं राजनीतिक अस्थिरताया हुनिं देय्या विकास जुइ मफूगु वाः चायेकाः तःधंगु राजनीतिक दल छवाः जुयाः सरकारय् वंगु धयादिल।

लिपांगु न्हि कुन्हु एमालेलिसे स्वानाः मखूगु खँ च्वयेकीगु जूगु न्ह्यथंसें थःगु पार्टीलिसे स्वाःगु दक्व विषयय् छानबिन यायेत हाथ्या बियादिल। महासचिव पोखरेलं अराजकताया विरुद्ध केपी ओली छधी जुयाः दंगुलिं वय्कःयात बदनाम यायेगु कुतः जुयाच्वंगु कंसें धयादिल, “नेकपा एमाले जनताया नुगलय् दु, देय्या नुगलय् दु, नेपाःया समाजय् छम्हनिम्ह मनूतय्सं न्ह्यागु खँयात नं षडयन्त्रया जाः दयेकीगु ज्या यानाच्वंगु दु, उकिइ झीपिं दक्व सचेत जुइमाः।” वय्कलं कम्बोडियाय् जुयाच्वंगु ज्याझ्वलय् एमालेया नेतातय्सं ब्वति कायेत वंबलय् तकं मखूगु च्वयेकल धासें आपत्ति यानादिल।

नेकपा एमाले सहकारी छानबिनय् मनू मजूसे घटना केन्द्रित छानबिन याये धइगु पक्षय् दूगु लुमंकूसें महासचिव पोखरेलं मनू केन्द्रित जुयाः अनुसन्धान याये धाइम्ह राष्ट्रिय स्वतन्त्र पार्टी सभापति आः थः हे अनुसन्धानया चाकः दुने दूगु खँ धयादिल। उकिया दोष आः एमालेयात बिइगु ज्या जुयाच्वंगुलिं वय्कलं आपत्ति यानादिल।

एमाले देय् दयेकेगु यात्राय् वनाच्वंगु धासें महासचिव पोखरेलं देय् दयेकीगु सन्दर्भय् वःगु दक्व छ्यातात एमालें न्यनीगु धकाः धयादिल। (रासस)

Categorized in राजनीति