प्रधानमन्त्री नाप नेकपा (एमाले) या अध्यक्ष केपी शर्मा ओलीं कानुन अःखः ज्या व अपराधयाइपिन्त सरकारं त्वतिइ मखु धका धयादिइगु दु।

नेकपा (एमाले) स्वनिगःया स्वंगू जिल्ला कमिटीपाखें थौं दरबारमार्गय् ग्वसाः ग्वगु जागरणसभायात सम्बोधन यासें अध्यक्ष ओलीं स्थिरता व सुशासनया निति विचार यानाः हे एमाले व नेपाली कांग्रेस मिले जुया नीस्वंगु थुगु सरकार अज्याःगु मखुगु ज्या नियन्त्रण यायेत सक्षम जू धका धयादिगु खः। थःपिनिविरुद्ध अनेक हल्ला न्ययेकुसां एमाले भ्रमया ल्यूल्यू ब्वायं मवनिगु धासें अध्यक्ष ओलीले क्वः नं न्हाय् पं यंकल धकाः धायेवतुं क्वःया ल्यूल्यू ब्वायं वनिइ मखु धका धयादीगु खः।

“थःम्हेस्यां हे सहकारी ठगी यायेगु अले मेपिन्त दोष बियेगु, म्हुतु वायेगु ज्या जुयाच्वंगु दु। थ्वज्याःगु छँु नं ज्या सह यायेगु जुइमखु। नेपाली जनता थःगु संस्कृतिया इतिहास व गौरवयात कायम यानाः ‘समृद्ध नेपाः सुखी नेपाली’या सङ्कल्पयात पूवंकेत न्ह्यने वनी।

नेपाली जनता भ्रमय् लाःगु मदु”, प्रधानमन्त्री ओलीले धयादिगु दु, “अलोकतान्त्रिक लँपुइ अराजकता सिर्जना यानाः समाजयात स्यकेत स्वइपि सार्वभौम जनताया भविष्ययात सङ्कटय् लाकेत स्वयाच्वंगु दु। थुकिइ झी सचेत जुइमाः। झीगु निंतिं देय् व जनता मू खँ खः। थुकिइ झीपिं दृढ व छवाः जुयाः न्ह्यज्यायेमाः।”

प्रधानमन्त्री ओलीं थः मचाखाचा तय्त अकुत सम्पत्ति मुंका अर्बौँ तकाया मालिक जूपिसं थः विरुद्ध द्वपं बिया वयाच्वंगु न्ह्यथंसें थःत भ्रष्टाचारया पतिंचा धस्वाकाः जुयाच्वंपिन्त बहसय् वयेत हाथ्या नं बियादिल। आःया समीकरण व सरकारयात सुना नं सकें फइमखु धासें प्रधानमन्त्री ओलीं आःया सरकार समाज व समुदाय दथुइ तरह तरहया विद्वेष न्यकेगु ज्यायात निरुत्साहित यायेत लगे जुयाच्वंगु दु धका धयादिगु खः।

बैंकया त्यासा पुलेम्वाः धाइपिं व उद्योगपाखें बिल कथं बिजुलीया बक्यौता ध्यबा मम्हइपिं तर बिजुलीया लाइन चाइपिंसं देय्या अर्थतन्त्रयात ध्वस्त दयेकेत स्वयाच्वंगु दु धकाः वय्कलं धयादीगु खः।

Categorized in राष्ट्रिय