नेपाली कांग्रेसया महामन्त्री गगन थापां निगू तःधंगु दलतय् दथुइ जूगु न्हय्गू बुँदाया सहमतियात संस्थागत यायेत नेपाली कांग्रेस व नेपाल कम्युनिष्ट पार्टी (एमाले) दथुइ राजनीतिक संयन्त्र दयेकूगु धयादीगु दु।

विराटनगर विमानस्थलय् थौं पत्रकारतलिसे नाप लानाः वय्कलं संविधान संशोधनया विषयकय् न्हापां नेपाली कांग्रेस व एमाले दथुइ मंकाः बिचाः दयेकीगु व अनंलिपा मेमेगु दललिसे सहलह यायेगु योजना दूगु धयादिल।

वय्कलं सुनां नं ययाः नं संविधानया मू मूगु विषयय् संशोधन मजुइगु तर्क यासें संविधान संशोधनया सन्दर्भय् जिम्मेवार दक्व राजनीतिक दलतलिसे सौहार्दपूर्ण लकसय् सहलह यानाः माः कथं क्वछिइगु जुइ धयादिल । महामन्त्री थापां धयादिल, “नेपाली कांग्रेसं संविधानया मर्म व भावना नापं पञ्चशीलया सिद्धान्तकथं फुक्क देय्तलिसे पासाया सम्बन्ध तइ।”

वय्कलं बिआरआई न्हूगु सम्झौता मखुसे पुलांगु हे जूगुलिं उगु सम्झौतायात आः क्वःछिइ माःगुलिइ बः बियादिल। विआरआईया सन्दर्भय् वःगु आशङ्कका व म्वाःमदुगु फय् खँयात फायेत प्रधानमन्त्रीया वइगु चीन भ्रमण सफल जुइगु भलसा कासें महामन्त्री थापां धयादिल, “विकासया निंतिं तःधंगु पुँजी मागुलिं झी मित्र देय्तपाखें आःयात त्यासा मखुसे अनुदान ग्वाहालिया अपेक्षा यानाःगु दु।

छगू न्ह्यसःया लिसलय् महामन्त्री थापां स्थानीय तहया वइगु उपनिर्वाचनय् न्हापाया स्वयां नेपाली कांग्रेसं बांलाःगु लिच्वः हइगु दाबी यानादिल।

Categorized in राजनीति