प्रधानमन्त्री केपी शर्मा ओलीं थौं झापाया मेचीनगर गाँउपालिका–४ आमडाँगीइ च्वंगु मानवसेवा आश्रमया जिल्ला ज्याकूया उलेज्या यानादिल। प्रधानमन्त्री ओली व वय्कःया तिरिमय्जु राधिका शाक्य नापं जानाः मानवसेवा स्मारक भवनया नी यायेगु ज्या नं यानादीगु खः।

उगु ज्याझ्वलय् आश्रमया नितिं निगू बिघा न्यागू कठ्ठा जग्गा दान यानादीपिं स्थानीय रामबहादुर प्रधान व वय्कःया छेँजःपिन्त हंगु खः। प्रधानमन्त्री ओलीं आश्रम भवन दयेकेया निंतिं थःगु छलाया तलब व तिरिमय्जु शाक्यं निलाया पेन्सन बीगु घोषणा यानादीगु खः। प्रधानमन्त्री ओलीया घोषणा लिपा मेमेपिं पाहाँ व जनप्रतिनिधितय्सं नं ग्वाहालि यायेगु बचं ब्यूगु खः।

शाक्य आश्रमया संरक्षिका जुयादी। थुगु आश्रमय् सतक आश्रित ४८ सहयोगापेक्षी तय्त लहिनातःगु दु। मेची नगरपालिकाया २५ लख ग्वाहालि व संस्थाया छगू क्वति लगानीइ स्वखाः छेँ व खिखांमुगः दयेकाः आश्रम सञ्चालनय् हयाःगु संस्थाया नायः रामजी अधिकारीं कनादिल।

थुगु संस्था लहिना तपिंमध्ये निम्ह मिजं व छम्ह मिसायात इमि छेँजःनाप पुनर्मिलन याना ब्यूगु दु।

Categorized in राष्ट्रिय