राष्ट्रपति रामचन्द्र पौडेलं संयुक्त राज्य अमेरिकाया पूर्वराष्ट्रपति जिम्मी कार्टर मदूगुलिं दुःख तायेकादीगु दु।

राष्ट्रपति पौडेलं थौं सामाजिक सञ्जाल एक्सपाखें वय्कलं दुःख तायेकादिसें शान्ति, मानव अधिकार व परोपकारय् कार्टरया योगदान हलिमय् हे प्रेरणा जूगु न्ह्यथनादीगु दु। राष्ट्रपति पौडेलं वय्कःया छेँजःपिं व अमेरिकाया जनताप्रति बिचाः हायेकादीगु दु।

अमेरिकाया ३९ म्ह राष्ट्रपति कार्टरया सच्छि दँय् आइतबाः जर्जियाया चीधंगु शहर प्लेन्सय् च्वंगु थःगु हे छेँ होस्पिस केयरय् मदूगु खः। वय्कःया जहान रोजालिन सन् २०२३ नोभेम्बरय् ९६ दँय् मदूगु खः।

थःगु ८० या दशकय् कूटनीतिक मिसनत न्ह्याकादीम्ह कार्टरं ९० या दशकय् गरिबतय्गु निंतिं छेँ निर्माण यानादीगु खः।

पूर्वराष्ट्रपति कार्टरं नेपालय् न्हापांखुसी जूगु संविधानसभा निर्वाचनया पर्यवेक्षण यायेत नेपाल भ्रमणय् झायादीगु खः।

Categorized in राष्ट्रिय