कम्प्युटर एशोसिएसन अफ नेपाल महासंघ (क्यान महासंघ) य् न्हूगु ज्यासना पुचः वःगु दु। थ्वहे पुस १३ गतेनिसें न्ह्याःगु महासंघया १५ क्वःगु महाधिवेशनं सनैना घिमिरे पाण्डेया नकिंसुइ न्हूगु ज्यासना पुचः ल्यगु खः।

क्यान महासंघं थःगु इतिहासय् न्हापांगुखुसि नकिंया नेतृत्व काःगु दु। वय्कः सफ्टवयर डेभलपमेन्ट कम्पनी जेनेरल टेक्नोलोजीया प्रबन्ध निर्देशक नापं जुयादी। महासंघया १५ क्वःगु ज्यासना पुचःया न्वकू खय् हर्कबहादुर सेटी, चिरञ्जीवी अधिकारी, नवीन जोशी, शेखरनाथ दुलाल, सुभाष खड्का व सिर्जना श्रेष्ठ त्यानादीगु दु।

मू छ्याञ्जेय् चन्द्रविलास भूर्तेल व दांभरीय् विक्रमसिंह त्यानादीगु दु। छ्याञ्जेतय् सरिता न्यौपाने, अग्मा मालाकार, दीपक साह, सरुना श्रेष्ठ, मनिराज पाण्डे, रामकिशोर रावल व कर्णराज पनेरु ल्यगु दु। अथेहे ज्यासना पुचःया दुजःत कथं उमेश रघुवंशी, ध्रुवराज शर्मा, केशवप्रसाद भट्टराई, नारायणप्रसाद श्रेष्ठ, ठाकुरकुमार श्रेष्ठ, शिला कंसाकार, दीपेन्द्र पौडेल, राजु कट्टेल, चिन्तामणि बास्तोला त्यानादीगु दु। लेखा समितिया कजिइ भानुभक्त शर्मा व दुजःपि कथं सन्तोष ढुंगाना व पूजा अग्रवालयात ल्यगु दु।

न्हूम्ह नकिं पाण्डें थःत सर्वसम्मत ल्ययेत ग्वाहालि यानादीपिं सकसितं सुभाय् देछासें सुचं प्रविधि ख्यःलय् खनेदया च्वंगु समस्यात चिइकेत मंकाः कुतः यायेगु धयादिल। वय्कलं नेपाःयात सुचं प्रविधिया ‘हब’ कथं च्वन्ह्याकाः अन्तर्राष्ट्रिय गन्तव्य कथं म्हसिका दयेकेत नीतिखय् भिंकेमाःगु व थुकिया नीतिं थःम्हेस्यां न्ह्यपला छिइगु धयादिल।

मू छ्याञ्जे भूर्तेलं क्यान महासंघया ज्या यायेगु लागा तब्याकेत विशेष ध्यान बिइगु व संस्थागत सुधारया निंतिं ठोस रणनीति दयेका क्यानया आज्जु पूवंकेगु बचं बियादिल। सन् १९९२ य् नीस्वंगु क्यान महासंघं सुचं व सञ्चार प्रविधिया ख्यःया विकास, विस्तार व प्रवद्र्धनय् न्ह्यःने च्वना ज्या यानावयाच्वंगु दु।

सन् २०१५ य् महासंघय् रूपान्तरण जुइ धुंका थुगु संगठनं न्हय्गू हे प्रदेश व ७४ जिल्लाय् कचा तब्याके धुंकूगु दु। क्यानं दँय् दसं ग्वसाः ग्वःया वयाच्वंगु ‘क्यान इन्फोटेक’ नेपाःया दकसिबे तःधंगु प्रविधि प्रदर्शनी कथं कयातःगु दु।

Categorized in राष्ट्रिय