लुम्बिनीया मायादेवी देगलय् तयातःगु दानपेटिकां १ क्वति ४३ लख ५९ द्वः ९ सः व ९० ध्यबाः मुंकूगु दु। न्ह्यानाच्वंगु आर्थिक दँय् थ्व निक्वःगु दानपेटिका गणना जूगु खः।

निक्वःगु थुगु गणनाय् उलि ध्यबा मुन धकाः लुम्बिनी विकास कोषं धाःगु दु। थ्व हे पुस १८ गतेनिसें २३ गतेतक दानपेटिका गणना याःगु लुम्बिनी विकास कोषया दांभरि ढुण्डिराज भट्टराई (सिद्धिचरणं) कनादिगु दु।

वय्कलं स्थानीय तह, सुरक्षाकःमि, प्रहरी व मेमेपिं स्वापू दुपिं मनू तय्गु ब्वतिइ उगु दानपेटिका चायेकाः गणना जुगु धयादिल। दानपेटिकाय् मुंकातःगु दानयात क्लोज सर्किट (सिसि) क्यामेराया निगरानीइ कोषया ३२ म्ह कर्मचारी तयाः गणना यायेगु व्यवस्था याःगु खः।

मायादेवी देगः चाःह्यू वइपिं तीर्थयात्रु तय्सं श्रद्धां थन दान बिइ। दानपाखें जुगु आम्दानीं कोषया आन्तरिक खर्च व्यवस्थापन जुया वयाच्वंगु धकाः कोषया दांभरि भट्टराईं धयादिल।

Categorized in राष्ट्रिय