वैदिक सनातन परम्पराकथं थःगु जःखःया द्यः पुज्यायेत नेपालय् चन्द्रमास कथं माघ महिनायात विशेष महत्व बियातःगु दु।

पौष शुक्ल पुन्हिनिसें माघ शुक्ल पुन्हितक लच्छि यंकं नेपाःया थीथी शक्तिपीठया पूजा यायेगु याइ। उगु थासय् सतीदेवीया म्हब्वःत पतन जुया द्यःपिनि बाय् जूवंगु विश्वासया लिधंसाय् थुगु परम्परा न्ह्याःगु खः। थनिनिसें वैदिक सनातन धर्मावलम्बीतय्सं विधि पूवंकाः माघय् म्वः ल्हुयाः स्वस्थानी व्रत लिसें बाखं कनाः पुजा न्ह्याकेगु याइ।

अप्वः यानाः मिसापिंसं थ्व व्रत च्वनेगु याः। नेपालय् न्यायेकिगु स्वस्थानी व्रतया विषयसं विद्यावारिधि शोध यानादीम्ह अमेरिकी नागरिक जेसिका भेन्तिन बिर्केनहोल्जं थ्व परम्परा दक्षिण एसियाय् जक हे नं मेथाय् गनं देशय् मदूगु धयादी। जेसिका थौंकन्हय् अमेरिकाया इलिनोय विश्वविद्यालयलय् धर्म विषयया उपप्राध्यापकया कथं ज्या याना च्वनादीगु दु।

पौष शुक्ल पुन्हिनिसें माघ शुक्ल पुन्हितक लच्छि यंकं स्वस्थानी व्रत व माघ स्नान याइ। पौष शुक्ल चतुर्दशीया न्हि ल्हा तुतिया लुसि ध्यनाः म्वः ल्हुयाः शुद्ध वसः पुनाः थुकियात न्ह्याकी । सुथय् माघस्नान यानाः न्हिनय् महाद्यःयात पुज्याइ।

बहनी स्कन्द पुराणया केदार खण्डलिसे स्वानाच्वंगु माघ माहात्म्यया कुमार अगस्त्यमुनि दथुया खँल्हाबल्हाय् जूगु स्वस्थानी व्रत बाखँ कनेगु न्यनेगु परम्परा दु।

Categorized in राष्ट्रिय