बागमती प्रदेशया प्रदेश प्रमुख दीपमप्रसाद देवकोटां भुखाय् नं जुइफइगु क्षति लुमंकाः ग्यायेगुसिबें सुरक्षात्मक उपायत यायेमाःगु धयादिल।

नीन्हय् क्वःगु भुखाय् सुरक्षा दिवस २०८१ या ई लाकाः बियादीगु भिंतुना सन्देशय् वय्कलं भुखाय् सचेतना व सुरक्षाया महत्वयात फुक्कं समुदायतक थ्यंकेमाःगु दु धकाः धयादिल।विसं १९९० माघ २ गते ब्वःगु तःभुखाय्या लुमन्तिइ न्यायेका वयाच्वंगु थुगु दिवसपाखें नागरिकय् सचेतना अप्वोय्केत ग्वाहालि याइगु थःगु विश्वास दूगु प्रदेश प्रमुख देवकोटां थःगु भिंतुना सन्देशय् धयादीगु दु।

थुगुसिया दिवस ‘भूकम्पले सिकाएको पाठ ः बलिया संरचना र सुदृढ पूर्वतयारीका साथ’ धाःगु नारा ज्वनाः न्यायेका च्वंगु दु। सन्देशय् भुखाय् प्राकृतिक प्रकोप जूगुलिं थुकियात पने मफइगु अथे खःसां सुरक्षित संरचना, सावधानी व पूर्वतयारी यानाः थुकिं जुइगु क्षतियात म्ह्वः याये फइगु धयादीगु दु।

“झीसं बल्लागु व सुरक्षित संरचना दयेकेगु पाखे ध्यान बियाः सम्भावित क्षतियात म्ह्वः यायेत न्हापां हे सावधानी प्रतिकार्यया उपायत छ्यलेमाः”, सन्देशय् धयातःगु दु।

Categorized in राष्ट्रिय