गण्डकी प्रदेश सरकारं प्रदेशय् गुरुङ व मगर भाषायात सरकारी ज्याखँया भाषा दयेकेत्यंगु दु। गण्डकी प्रदेशया सामाजिक विकासमन्त्री विन्दुकुमार थापां प्रदेश सरकारं निगुलिं भाषायात सरकारी ज्याखँया भाषा दयेकेत प्रक्रिया न्ह्याकेधुंकूगु खँ कनादिल।

मन्त्रालयं आइतबाः दमौलीइ गुरुङ व मगर भाषायात सरकारी ज्याखँया भाषा दयेकेत सुझाः मुंकेगु ज्या न्ह्याकूगु दु। सरकारं मगर भाषा व गुरुङ भाषायात प्रदेश सरकारी ज्याखँया भाषा दयेकेत विधेयक तयार यायेधुंकूगु दु। उगु हे विधेयकय् च्वनाः प्रदेशया थी थी जिल्लाय् वनाः सुझाव मुंकेगु ज्या जूगु खँ मन्त्री थापां कनादिल।

गण्डकी प्रदेशदुने च्वंपिं अप्वो धइ थें जनतातय्सं ल्हाइगु मगर व गुरुङ भाषाया संरक्षण, संवद्र्धन नापं विकास यानाः सरकारी ज्याखँय् छ्यले अःपुकेत सरकारी वा सार्वजनिक निकायं प्रवाह जुइगु सेवाय् जनताया पहुँच अःपुकेत व प्रत्याभूतियात अप्वकेगु कुतः खः धइगु मन्त्री थापाया धापू दु।

भाषा आयोग येँपाखें प्रदेशगत सरकारी ज्याखँया भाषा क्वःछिइगु आधारत पूवंनीगु अवस्थाय् दूगु मगर व गुरुङ भाषायात प्रदेशया सरकारी ज्याखँया भाषाया कथं छ्यलाबुलाय् हयेत सिफारिस जूगु मन्त्री थापां धयादिल। सामाजिक विकास, युवा नापं खेलकुद मन्त्रालयया प्रस्तावय् गण्डकी प्रदेश सरकारं वंगु साउन २२ गतेया निर्णयकथं उगु विधेयक तर्जुमाया निंतिं सैद्धान्तिक सहमति दयाः मस्यौदा निर्माण प्रक्रिया जुयाच्वंगु वय्कलं धयादिल।

वइगु चिकुलाया थुकियात अधिवेशनं संसदय् तयेगु सरकारया योजना दु। गण्डकी प्रदेशय् मगर समुदाय १८.८ प्रतिशत व गुरुङ समुदाय ११ प्रतिशत दु। गण्डकी प्रदेशदुने मगर निगूगु व गुरुङ प्यंगूगु तःधंगु समुदायत खः।

Categorized in राष्ट्रिय