युुवा बौद्ध समूह, येँ नं छगू विज्ञप्ति पिथना समूहया पुलांम्ह नायःलिसें सल्लाहकार चिनीकाजी ताम्राकार मदुगुलिइ दुःख प्वंकुसे दिवंगत ताम्राकारया छेँजःपिंप्रति बिचाः हायेकूगु दु।

नेपाःया धातुकलाया थ्वज्या, माज्या, किज्या, जदाउया नापनापं चित्रकारिता व फोटोग्राफी नं यानाच्वंनादीम्ह ताम्राकार म्हिगः चान्हय् ९० दँया वैंसय् मदुगु खः। वय्कलं नेपाः सरकारपाखें लःल्हाइगु विभूषणत नं दयेकादीगु खः।

मदुम्ह ताम्राकार युवा बौद्ध समूहया दुजःया नापनापं उदाय् समाजया छ्याञ्जे रजनी ताम्राकारया अबु खः।

अथे हे, समूह नं बौद्ध संघ ख्वपया नायः लिसें नेपाल भाषाया वरिष्ठ कवि त्रिरत्न शाक्य म्हिगः आकाझाकां मदुगुलिं दुःख प्वकुंसें वय्कःया सुगतिया कामना नं याःगु दु।

Categorized in राष्ट्रिय