प्रधानमन्त्री केपी शर्मा ओलीं पाल्पाया बगनासकाली गाउँपालिकाया प्रशासकीय भवनया थौं ‘भर्चुअल’ कथं उलेज्या यानादिल।

प्रधानमन्त्री ओलीं थौं उगु हे थासय् वनाः उलेज्या यायेगु ज्याझ्वः दूगु जुसां उसाँय्या प्रतिकूलताया हुनिं प्रधानमन्त्री निवास, बालुवाटारं सम्बोधनयासें भवनया उलेज्या यानादीगु खः।

प्रधानमन्त्री ओलीं प्रशासकीय भवनं स्थानीय जनतायात लुदंक सेवा काये खंगु अनुभव जुइ कथं ज्या यायेत इनाप यानादिल। वय्कलं पाल्पा छगू ऐतिहासिक व न्ह्यैपुसेच्वंगु जिल्ला जूगुलिं थुगु छवियात थनया जनतातय्सं म्वाका तइ धैगू विश्वास नं प्वंकादिल। सिद्धबाबा सुरुङलिसेंया विकास निर्माणया ज्याय् थःपिनिगु हे कार्यकालय् पूवंकेगु कथं ज्या जुयाच्वंगु नं वय्कलं कनादिल।

खनिज तत्वया उपयोगयय् पाल्पा न्ह्यःने लानाच्वंगु व कृषिइ उद्यमशीलता लिसें समग्र विकासय् थ्व जिल्ला अझं न्ह्यज्यावनी धकाः प्रधानमन्त्री ओलीं धयादिल  ‘भर्चुअल’ कथं याःगु उगु ज्याझ्वलय् उपप्रधान लिसें सहरी विकासमन्त्री प्रकाशमान सिंह, उपप्रधान लिसें अर्थमन्त्री विष्णुप्रसाद पौडेल नं दी।

Categorized in राष्ट्रिय